हको अलफ़ मैनूं बरमावम ड़ी ।तत्ती बे ते मूल न भावम ड़ी ।
सोहनी वहदत परम परीतां नैं ।ज़ौकी घातां इशकी गीतां नैं ।
कोझी कसरत कोझां रीतां नैं ।दिल गैरों ग़ैरत खाविम ड़ी ।
हर चालों नाज़ नवाज़ डिस्से ।सब हुसन अज़ल दा राज़ डिस्से ।
कुल आलम आलम साज़ डिस्से ।हक्को नूर नज़र विच्च आविम ड़ी ।
गैरियत महज़ मुहाल डिस्से ।चौ तरफ़ो हुसन जमाल डिस्से ।
हर वेले वसल वसाल डिस्से ।डेंह रात पुन्नल गल्ल लाविम ड़ी ।
क्युं करदी हार सिंगार मुट्ठी ।क्युं सुरख़ी कज्जला धार मुट्ठी ।
जे जाना सांवल यार मुट्ठी ।वल मुलक मल्हेर सिधाविम ड़ी ।
तत्तां दरद जदीद शदीद थिया ।हर रोज़ ए सोज़ मज़ीद थिया ।
हक्के दीद ख़रीद थिया ।बिन ढोलन घर वरतांविम ड़ी ।

हक्को डिट्ठम हर गाल कनूं ।हक्का रमज़ लद्धम हर चाल कनूं ।
हर सूरत मन नूं मोंहदी है ।हर मूरत दिल नूं कोंहदी है ।
सब निसबत यार नूं सोंहदी है ।हर हाल कनूं हर काल कनूं ।
कथे दिलबर थी मन मोंहदा है ।कथे आशक हो कर रोंदा है ।
कथे रब्ब तों फारग होंदा है ।ग़म नाज़ दी कैद वबाल कनूं ।
बदनामी मैडा नाम होया ।ग़म खावन शरब मदाम होया ।
रत पीवन काम दवाम होया ।छुट पैवसे शरम दी जाल कनूं ।
डेखो हुसन हकीकी ज़ाहर है ।क्या अन्दर है क्या बाहर है ।
किथे नासी है कत्थे माहर है ।सोहना आपने वसल वसाल कनूं ।
जडां इशक फ़रीद उसताद थिया ।सब इलमो अमल बरबाद थिया ।
पर हज़रते दिल आबाद थिया ।सो वजद कनूं लक्ख हाल कनूं ।

हुन दिल बदलायम सुर साईं ।ग्या दरदों जियड़्ड़ा झुर साईं ।
दरद दे कंडरे सीने ।लगड़े हिन देरीने ।
पए निकलन भुर भुर साईं ।
डुक्खड़े रोज़ सवाए ।जैं डेंह सज्जन सिद्धाए ।
शहर भंभोरों टुर साईं ।
डेहां रातीं मातम ।डुक्ख आया सुख वाटम ।
खुशियां दे थए पुड़ साईं ।
यार न आवे अक्खियां ।रो रो हुट्टियां थक्कियां ।
डेंह राती दी फुर फुर साईं ।
चमड़ा, मास, लवीरां ।कप्पड़े लीर कतीरां ।
बिरहों डित्तो से पुर साईं ।
सबर फ़रीद न आवे ।घर खावे ते झड़ तावे ।
दिल्लड़ी कीतम लुर साईं ।

हुन इशक वंजायम चस्स साईं ।लक्ख वार असाडी बस्स साईं ।
रात डेंहां तड़फावां ।अते रो रो हाल वंजावां ।
रहम न कीतो खस्स साईं ।
कल्हड़ी पई कुरलावां ।खपदी उम्मर निभावां ।
धां करां बे वस्स साईं ।
चाक महीं मन भाने ।मेहणीं डेवम ननाने ।
ताअने मारम सस्स साईं ।
निन्दर सभो डुक्ख लायम ।सुत्तड़ीं साथ लडायम ।
ना कई ख़बर न डस्स साईं ।
इशकों सूद न पायम ।सारा भरम वंजायम ।
जो लगड़ी सो कस साईं ।
डुखे पैंडे थल दे ।पूर पौविन पल पल दे ।
दरदीं दी हत्थ रस्स साईं ।
दरद अन्दोह घनेरे ।करदे सूल वहीरे ।
नस्स ग्युं दिल खस्स साईं ।
ग़म फ़रीद सतायम ।डूख़्ख़ड़ा नेहड़ा लायम ।
मूह सर पायम भस्स साईं ।

हुन कीतम बिरहों तंग साईं ।दिल नाल असाडी जंग साईं ।
ग़मजे सखत अवैड़े ।झेड़े करन बख़ेड़े ।
ना कुझ तरस ना संग साईं ।
इशक मरीले लुटियां ।हुट्टियां मुट्ठियां कुठियां ।
तन मन चूर चौरंग साईं ।
गुज़रे वेले सुख़ दे ।जी जुख़दे प्या डुक्खदे ।
रग रग ते अंग अमग साईं ।
दरद अन्दोह पुराने ।झुरदी झोर झगाने ।
यार मिलम दिल संग साईं ।
इशक अलामत ज़ाहर ।सूल घने ते लाग़र ।
सावा पीला रंग साईं ।
नेंह नगली छाते ।मिली फ़रीद बचाते ।
ग्या नामूस ते नंग साईं ।

हुन मैं रांझन होई ।रेहा फ़रक न कोई ।
जै संग दिल्लड़ी पीत लगाई ।आख़र बण गई सोई ।
हीर सलेटी चूचक बेटी ।वंज किस जा खड़ोई ।
हीरों हीरा थीसी जेकर ।सर हीं राह डितोई ।
पहले खा कर दरद कशाले ।ओड़क थई दिल जोई ।
शाबस असलों महजन हार्यों ।जितना बार चतोई ।
जो कोई सिलक मुहबत दे विच्च ।मरन दे अग्गे मोई ।
सेझ सुहाग सुहायस थी खुश ।शाम सुन्दर संग सोई ।
नाल ख्याल अना दे जै ने ।मैल दूई दी धोई ।
सारे जग विच्च हिक्क मैं रह गई ।ना तूई ना ऊई ।
थया मनसूर फ़रीद हमेशा ।जै ए राज़ लधोई ।

हुन वतन बिगाने दिल नहीं आवनड़ां ।याद कीतम दिलदार नीं ।
कोले रहसां मूल न सहसां ।हजर दा बारी बार नीं ।
विस्सर्या सारा राज बबानड़ां ।विसर ग्या घर बार नीं ।
भांड़ मनड़ेसां मांड़ नभेसां ।घोले आर व यार नीं ।
सुरखी कज्जल मसाग क्युं से ।बट्ठ प्या हार सिंगार नीं ।
पारों डिसदी झोक सज्जन दी ।क्युं रहसां उरवार नीं ।
मैं मनतारी ते नै बारी ।कादर नेसम पार नीं ।
बट्ठ पई सिंधड़ी कीतम मूला ।मुलक मल्हेर मल्हार नीं ।
देस अरब दा मुलक तरबदा ।सारा बाग़ बहार नीं ।
रोही रावीं रोही रुलसी ।नस्स ग्या करहों कतार नीं ।
डेंह डुक्खां दा डूंगर डिस्सदा ।रात ग़मां दी मार नीं ।
सांवल आया रोही वट्ठड़ी ।बार थई गुलज़ार नीं ।
दार मदार फ़रीद है दिल नूं ।डुक्खड़े तारो तार नीं ।

हुसन अज़ल दा थिया इज़हार ।अहदों वेस वटा थी अहमद ।
सलब सबूत जथां मसलूबे ।उथ न तालब न मतलूबे ।
है लायद रिका अलअब सार ।बेहद मुतलक, मुतलक बेहद ।
गैबलगैब दे देसों आया ।शहर शहादत देर अलाया ।
अहदियत दा घुंड उतारा ।थिया इतलाकों महज मक्कियद ।
हक बातल हक है हक है ।पराए राज़ बहूं मुग़लक है ।
यार है यार है यार है यार ।सोहना कोझा नेक अते बद ।
यो दिलबर बे चूं व चगूना ।नाहीं जेहदा मिसल नमूना ।
तिसदा है बे शक तकरार ।दुनियां अकबा मजोला मशहद ।
गई तकलीद आई तहकीके ।थीए वाज़्या मकशूफ दकीके ।
फ़ाश मबियन कल इसरार ।बरजुख ज़ोर ज़बर शदमद ।
कीता अज़ली लुतफ जहूरा ।सौ सौ शुकर मिल्या गुर पूरा ।
थिया दिल कूं तसकीं करार ।होए खतरात शकूक सभे रद ।
पीरे मगां मसजूदु जतौ से ।फ़रज फ़रीद नमाज नतोसे ।
कीता मन कर मन्न इकरार ।है ख़ुद असल हकीकी मकसद ।

इह नाज़ अदा सांवलड़े दे ।हन बायस इशक अवल्लड़े दे ।
गए वेले भाग सवलड़े दे ।आए दरद कलल्लड़े दे ।
डित्ते पेश फ़राक पुन्नलड़े दे ।डुक्खे पैंडे मारू थल्लड़े दे ।
गए गुज़र डेहाड़े रलड़े दे ।तरसलड़े अेस सुखलड़े दे ।
हुन परभत रोह ज़बलड़े दे ।सुखपाल थए दिल जल्लड़े दे ।
जुड़ कीती बिरहें छोल मुठी ।ग्या हार शिंगार दा तोल उठी ।
लगी फकड़ी हू हू दोल रुट्ठी ।वाह भलड़े भाग़ा भल्लड़े दे ।
सब मिशरी खंड नबात भुलेम ।ऐज़ाज मसीह दी बात भुलेम ।
मै कंसर आब हयात भुलेम ।सुन शोख सुखन गव्वलड़े दे ।
लगा नेंह न्यारड़ी पीड़ असां ।दिल चुभड़े बरछे तीर असां ।
सौ सौ नसतर लख़्ख़ लक्ख सीड़ असां ।निभ वकत चके दरमलड़े दे ।
लगी नोक नज़र ग्या होश हुनर ।रहो दरद अन्दर सदा सूल जिगर ।
डोड़े ज़ुलम कहर ढां मूंह दे भर ।डुक्खे रोह डूंगर राह वल्लड़े दे ।
सट्ट नहमल मलमल रंग महल ।गए सांग बदल कोई लहम न कल ।
रिच्छ राखस घल ममीं डैनी दल ।आए पेश संभल सर कलड़े दे ।
वल वल प्या ज़ुलफ पुन्नल दा गल ।पए शोज़ ओछल पए रोग ओटल ।
गए सुखड़े ढल गईआं खुशियां जल ।दिल चलड़े नेश अज्जलड़े दे ।
कुल कारैं इशक फ़रीद कीता ।घर बारो बिरहें बईद कीता ।
हर पल पल शौंक जदीद कीता ।मूंह नूर भरे निरमल्लड़े दे ।

इशक अनोखड़ी पीड़ ।सौ सौ सूल अन्दर दे ।
नैन वहायम नीर ।अल्लड़े ज़खम जिगर दे ।
बिरहों बखेड़ा सख़त आवैड़ा ।खवेश कबीला लाविम झेड़ा ।
मारग मा प्यु वीर ।दुसमन लोक शहर दे ।
तांग अवल्लड़ी सांग कलल्लड़ी ।जिन्दड़ी जलड़ी दिल्लड़ी गलड़ी ।
तन मन दे विच्च तीर ।मारे यार हुनर दे ।
ग़मजे सेहरी रमज़ां वैरी ।अक्खियां जादू दीद लुटेरी ।
जुलमीं ज़ुलफ़ ज़ंजीर ।पेची पेच कहर दे ।
पीत पुन्नल दी सिक पल पल दी ।मारूथल दी रीत अज़ल दी ।
डुक्ख लाविन तड़भेड़ ।जो सरदे सो करदे ।
तुल नेहाली डेन डिखाली ।सबर आराम दी विसरिअम चाली ।
लूं लूं लक्ख लक्ख चीर ।कारी तेग़ तबर दे ।
यार फ़रीद न पायम फेरा ।लाया दरदां दिल विच्च देरा ।
सर ग्युम सीस सरीर ।नैसां दाग़ कबर दे ।

इशक असांझी जा आहे इनसाफ ।
ज़ुलम नभाएं दस तांभी तहंजा थोग गाएंदस ।
सिजदा जानब तहंजी, तहंजे गिरद तवाफ ।
कदम कदम ते सीस नवाएंदस ।
तुहंजी सीरत, सूरत सोहनी किवें क्यां औसार ।
जिन्दड़ी तों तूं घोल घुमाएंदस ।
तन मन सोहणां मुलक है तुहंझा सच आहे ना है लाफ ।
कसम अवांझे सर जी खाएंदस ।
ज़िकर ऊं फिकर है तहंजा, दम दम चुएंदस साफ जा साफ ।
अबद मअबूद मैं तोखे याएंदस ।
बांदी गोली यार दी आहियां ना है फरीद खलाफ ।
उन्हे भै भाएदस खूह न भाएंदस ।

इशक अवल्लड़ी चाल भला यार वे ।यारियां लावन सर मंगदियां ।
ज़ुलफ़ा दिल नूं पाविन जाली ।अक्खियां करदियां मसत मवाली ।
नाज़ निगाहां दे नाल भला यार वे ।बिरहों बछेंदियां नहीं संगदियां ।
चशमां कहरी रमज़ां वैरी ।अख़्ख़ियां ज़ालम दीद लुटेरी ।
डेवन जिन्दड़ी गाल भला यार वे ।सिरहो बहादुर हुन जंगदियां ।
नाज़क चालीं यार सज्जन दियां ।मोहणियां गाल्ही मन मोहन दियां ।
करन दिलीं पामाल भला यार वे ।हर हर आन खड़ियां तंगदियां ।
चेहरी तरज़ डिखावन अक्खियां ।ज़ुलफां तेल फुलेल दियां मक्खियां ।
घतदियां जी जंजाल भला यार वे ।ज़ोरे रग रग नूं डंगदियां ।
इशक फ़रीद कशाले घल्ले ।आस उमीद तस्सले भल्ले ।
कूड़ा वहम ख़्याल भला यार वे ।डिट्ठड़ियां पीतां दिल संगदियां ।

इशक अवलड़ी पीड़ वो ।लोकां ख़बर न काई ।
ज़ुलफ़ डंगेदीं मूल न संगी ।चशमां सरहों बहादर जंगी ।
नाज़ निगाह दे तीर वो ।नित्त करन लड़ाई ।
शाला नेड़ा कोई न लावे ।दरद अन्देशे सोज़ सवाए ।
दम दम दिलगर वो ।सर ते सख़ती आई ।
हक्क बेवाही ब्या फट जाही ।मूंझ मुंझारी गल दी फाई ।
तक्क तक्क राह मल्हेर वो ।रोदीं मोइम अजाईं ।
सुंज बर चड़ड़े शीह मरेले ।बशीर बद बघ्यार बघेले ।
डुक्ख डुक्खड़े थए वीर वो ।ग़म सकड़े भाई ।
सैणीं भैणीं वैन अलावम ।वीरन वैरी सख़त सुभावम ।
मारम बे तकसीर वो ए बेदरद कसाई ।
सूलम मूल न डित्तड़म साही ।कादर एंवें कलम वहाई ।
कीतम ते तकदीर वो ।सोहने नाल जुदाई ।
जिन्दड़ी जुक्खदी जियड़ा दुखदा ।वेल्हा वकत निभाया सुखदा ।
रंजो आलम दी भीड़ वो ।आफ़त प्युस समाई ।
मिज़ेगीं नशतर हादी मारी ।पलकी लाई कैबर कारी ।
ज़खम कलल्लड़े चीर वो ।वैंदीं चोट चलाई ।
लूं लूं सड़दी हड्ड चंम गलदा ।दिल्लड़ी जलदी सीना बलदा ।
रग रग छुटड़ी सीढ़ वो ।तैडे बिरहों छुडाई ।
सबर करार आराम ग्युसे बार मलामत मुफ़त चतोसे ।
कानी बे तदबीर वो ।जानी ला डिखलाई ।
यार फ़रीद न खड़ मुकलाया ।केच ग्या वल्ल घर न आया ।
डित्तड़म जुड़ ताअज़ीर वो ।कीतोस ख़ूब भलाई ।

इशक भुलाया ताआतां ए घर मेरा घर सुख मन्दर ।मअमूर ख़फ़ी दे अन्दर ।
जिथ बहर महीत दा मन्दर ।उथ हर जिनसों मिलन सौगातां ।
आई हाल मकाम दी वारी ।थई्ई रफ़ा हजब यक बारी ।
गई ज़हद इबादत सारी ।हज्ज ज़कवातां सौम सलवातां ।
थई नसरत फ़तह फ़तूही ।सब सरी कलबी रूही ।
गई ज़ुलमत नूर सबूही ।कीतियां जिसम अजब परभातां ।
सर्र अनहद तबल शहाना ।खुश मतरब तान तराना ।
ग्या नफ़ल नमाज़ दोगाना ।विस्सरियां डों तिरे चार रकअतां ।
गुर बात बताई पूरी ।तीफूरी ते मनसूरी ।
थई फाश तज्जली तूरी ।हर जा ऐमन ते मीकातां ।
ए वजदानी शतहातां ।हन वहदत दियां आयातां ।
कर तमस दिलीं सतवातां ।करदा ज़ाहर ए कलमातां ।
कुल उठ गए फ़गन ज़लाज़ल ।भज्ज पए अगलाल सलासल ।
दिल हिक पासे शागल ।बट्ठ दरकातां ते दरजातां ।
थए भाग फ़रीद भलेरे ।दिल दिलबर लाए देरे ।
आ कान्ह दवारे मेरे ।बंसी जोड़ सुणाईआं घातां ।

इशक चलाए तीर ।डाढे ज़ुलम कहर दे ।
यार मिल्या बे पीर ।लूं लूं विच्च सौ दरदे ।
इशक उजाड़ी झोक अमन दी ।नज़र न आवम जोह जतन दी ।
सोज़ डितोस जागीर ।जियड़ा सूलां सड़दे ।
तूल डुक्खां दी सेझ न भांदी ।सूल सर्हांदी दरद पवांदी ।
रग रग विच्च है पीड़ ।डिस्सदा रोग अन्दर दे ।
रहन न डेंदी पीड़ पराई ।सिक्क महींवाल दी रोज़ सवाई ।
कीजो लोढ़ेम सीढ़ ।बोड़िम कन कप्पर दे ।
सुख सोमन दा वकत वेहाया ।बार बिरहों दा सर ते आया ।
गुज़र गई तदबीर ।निभ गए वकत हुनर दे ।
निभन फ़रीद ए डुक्ख डुहले ।शाला नाल वसाल सुहीले ।
होवां शकर शीर ।गुज़रन डेंह सफ़र दे ।

इशक लगा घर विसर्या ।ज़र विसरी वर विसर्या ।
गुज़रे नाज़ हुसन दे मानड़े ।ज़ेवर तरेवर विसर्या ।
विसरे कजले सुरखी मेदियां ।बल्ला बैंसर विसर्या ।
दरद अन्देशे दिल दी मूड़ी ।ब्याकुल जोहर विसर्या ।
दैर कनिशत दवारा मन्दर ।मसजद मम्बर विसर्या ।
हक दे शांगे हकदी सौंह है ।खैर भली शर विसर्या ।
हर वेळे हर याद असानूं ।होर अमान हर विसर्या ।
वैसां कीच फरीद न मुड़सां ।सुंज बरदा डर विसर्या ।

इथां मैं मुठड़ी जिन्द जान बलब ।ओतां ख़ुश वसदा मुलक अरब्ब ।
हर वेले यार दी तांघ लगी ।सुंजे सीने सिक दी सांग लगी ।
डुखी दिलड़ी दे हत्थ टांघ लगी ।थै मिल मिल सूल समोले सब ।
तती थी जोगन चौधार फिरां ।हन्द सिंध पंजाब ते माड़ फिरां ।
सुंज बार ते शहर बाज़ार फिरां ।मतां यार मिलम कही सांग सबब ।
जैं डेंह दा नेंह दे शीह फट्ट्या ।लगी नेश डुखादी ऐश घट्या ।
सब जोबन जोश खरोश हट्ट्या ।सुख सड़ गए मर गई तर्हा तरब ।
तोड़ धकड़े धोड़े खांदड़ी हां ।तैंडे नाम तों मुफ़त वकांदड़ी हां ।
तैंडी बांदियां दी मैं बांदड़ी हां ।है दर द्यां कुत्यां नाल अदब ।
वाह! सोहना ढोलन यार सजन ।वाह सांवल होत हजाज़ वतन ।
आ डेख फरीद दा बैत हज़न ।हम रोज़ अज़ल दी तांघ तलब ।

जग वहम ख़्याल ते ख़वाबे ।सब सूरत नकश बर आबे ।
जे पुछदीं हाल हकीकत ।सुन समझ अते रक्ख इबरत ।
जिवें बहर महीत है वह्हदत ।कुल कसरत शकल हबाबे ।
नहीं असलों असल दूई दा ।ख़ुद जान है नसल दूई दा ।
ग्या फोका निकल दूई दा ।वल ओही आब दा आबे।
न काफ़ी जान कफाया न हादी समझ हदाया ।
कर पुरज़े जलद वकाया ।एहा दिल कुरान कताबे ।
है परम ग्यान वी दिल्लड़ी ।है बेद पुरान वी दिल्लड़ी ।
है जान जहान वी दिल्लड़ी ।दिल बतन बतून दा बाबे ।
दिल लुब है कोन मकां दा ।दिल गायत असल जहां दा ।
दिल मरकज़ ज़मीं ज़मां दा ।ब्या कूड़ पलाल हजाबे ।
विच्च सूरत दे नासूती ।विच्च माने दे मलकूती ।
जबरूत अते लाहूती ।दिल अन्दर सब असबाबे ।
रक्ख अमतर ध्यान फ़रीदी ।सट्ट सुखड़ी पीर मुरीदी ।
है दूरी सख़त बईदी ।जी सुखड़ीं कान अज़ाबे ।

जैं रमज़ गवल जी बुझ्झी ।तिन खे मुशाहदा रात दिन ।
नहीं जा अथां अफीयून दी ।ना भंग ना माजून दी ।
जिन्हां सुध लखी बेचून दी ।नित्त मसत रे पैतीं वतन ।
रल वस्सदे लोकां नाल हन ।पर असल फ़ारगबाल हन ।
हर आन ग़रक ख्याल हन ।शागल सुम्हन शागल उठन ।
ख़ुद तों ख़ुदी तों दूर हन ।सर मसत जाम तहूर हन ।
हक्क दे हमेश हजूर हन ।अवलीं विचों भोलो भनन ।
नहीं मिलक मुलक ते माल दे ।नहीं ज़ाल दे नहीं बालदे ।
हन जौक वजद ते हाल दे ।गुम कर गुमान यकरूर हन ।
सिर डे लहन सिरवा लका ।गए महज़ मरनों सिर लुका ।
होकर फना पावन बका ।सौ सूद नुकसानो करन ।
वंज वुट्ठड़े देस सुहाग दे ।सुख रूप मानड़न भाग दे ।
बारा महीने फाग दे ।पा चैन चढ़ सेजीं बहन ।
जैं मान मन्दर पाया पिया ।डुक्ख पाप सारा मिट ग्या ।
थी महव असबाती थिया ।रहन्दा फ़रीद फ़रीद बन ।

जड़ां जायम पाकर झोली ।कर वैन डित्ती मा लोली ।
पहलों पीत न पई प्यु मा दी ।वत होत बलोच न राधी ।
मैं मुट्ठड़ी जावन ला दी ।हम बख़त सड़ी डुक्ख रोली ।
घर फ़ख़र प्या पूं पावे आ उजड़ी झोक वसावे ।
रल चेतर बहार सुहावे ।वस्स हस्स रस्स खेडूं होली ।
तोड़े दरशन मूल न पेसां ।तां वी नाज़क नेंह निभेसां ।
विच्च कोट शहर मर वैसां ।थी दर दिलबर दी गोली ।
सारा बोछन घाघे ।गए ज़ेवर तरेवर लांघे ।
सर मांग मरेंदी सांगे ।थई सुरख़ी ज़हर दी गोली ।
बिन यार न सेज सुहेसां ।फ़ुल सेहरे तरोड़ स्टेसां ।
भन बेंसर बोल सड़ेसां ।बट्ठ चन्दन हार बनोली ।
सईआं रल मिल मेहने डेंदियां ।खल हासे कीस करेंदियां ।
मा भैणीं वैन अलेंदियां ।सस्स मारिम सौ सौ बोली ।
जिद जलड़ी जिन्दड़ी झूली ।जथ करड़ कंडा सब सूली ।
डिस्से ककरे रतेरड़ कूली ।दिल दरद चलाई गोली ।
हर पल पल पीत पुन्नल दी ।सिक्क सांवल बारोचल दी ।
है तैडी रोज़ अज़ल दी ।एहा कोझी कमली भोली ।
दिल यार फ़रीद न आया ।सर सूलीं सांग रसाया ।
सब हार सिंगार वेहाया ।गई नाज़ नवाज़ दी टोली ।

जीवन डेंह अढाहीं वो यार ।सट घत फखर वडाई वो यार ।
किथ ओ पींघ पिपल मलकाने ।नाज़ हुसन कथ राज बबाने ।
कथ मा भैणीं भाई वो यार ।
किथ रांझन किथ खेड़े भैड़े ।किथ रह गए ओह झगड़े झेड़े ।
किथ चूचक दी जाई वो यार ।
किथ ओ मकर फ़रेब दा चाला ।किथ वत जोगी मुदरां वाला ।
परम जड़ी जैं लाई वो यार ।
माही, मंझियां, हीर सलेटी ।अतरों भिनड़ी मुशक लपेटी ।
गए सब झोक लडाई वो यार ।
जोबन साथी चार डेहां दा ।झट पट ज़ुअफ़ बढेपा आंदा ।
कूड़ी आस पराई वो यार ।
है है डिट्ठड़ी कहीं न वैंदी ।कजल मसाग ते सुरखी महन्दी ।
सुरमा सेंध सलाई वो यार ।
मौसम रुल फिर वल घर आई ।वंजन न वकत निरास अजाई ।
आवन दी कर काई वो यार ।
कूड़ी सुहबत कूड़ी संगत ।कूड़े नखरे कूड़ी रंगत ।
लप्प धूड़ी बुक छाई वो यार ।
मछलीं पीगीं लासू तारीं ।चणकी घंडड़ी होरां तवारी ।
सहजों रांद रसाई वो यार ।
थियां सरसबज़ फ़रीद दियां झोकां ।मेहरों सबज़ थियां वल सोकां ।
बखतीं वाग वलाई वो यार ।

झोपड़ जोड़ूं चिक खिप थड ते ।एझां न होवे सारे मड ते ।
न वकड़े न बन्द ते बहसां न गठ पाड़ दी खड्ड ते ।
सांवन आन सुहेसां रोही ।सिंधड़ों सघरी लड्ड ते ।
जे पानी खुट वैसी बहसूं ।ढाए ते कल अड्ड ते ।
शहर भंभोर वी खावन ओसम ।होत ना जावीं छड्ड के ।
तेग़ फ़रीद बिरहों दी वैह गई ।चम चम ते हड्ड हड्ड ते ।

जिन्दड़ी उचाके जीड़ा उदासे ।जापे तत्ती कूं केंदी प्यासे ।
पेकीं सुरीझीं गिल्लड़े वेखो है ।डेंदी मुट्ठी नूं मा भैन डोहे ।
किसमत दियां गाल्हीं दिलबर वी दरोहे ।एडों ग्यु से ओडों ग्यासे ।
थई आस पासे आई यास पासे ।ज़रबफ़रत डोरे मलमल ते ख़ासे ।
खंडड़ियां नबातां मिसरियां पतासे ।कचड़े उडाहे कूड़े दलासे ।
लिखड़ी मथे दी पलड़े प्यासे ।वह वाह ख़ुदा दे कंम बे क्यासे ।
जेढ़ीं कूं मुंह वी लेंदे न हासे ।मिल मिल करेंदियां खल टोक हासे ।
मूंह वेढ़ ठडड़े पई साह भरदी ।वैंदी निधाई डेंह व डेंह न ज़रदी ।
चस रस न मानड़िम घर दी न वरदी ।हक्क पल न डित्तड़म सिख सेज पासे ।
बिरहों बछेंदा लक्ख लक्ख बलाईं ।थी थी डखारी मंगदी दुआईं ।
शाला कहदियां या रब कडाहीं ।दीदां न अटकन दिल्लड़ी न फासे ।
सांवल सलोना मारू मरेला ।निखड़्या न डिट्ठड़म कोई वकत वेल्हा ।
शुरख़ी डुहागिन कज्जला डोहेला ।गल ग्या फ़रीदा जोबन नरासे ।

जिन्द सूलां दे वात ने ।डित्तरी बिरहों बरात ने ।
कडीं डेंह डुक्खां दा सिर ते ।कडीं ग़मां दी रात ने ।
तूल तलेंदी सेझ सड़ेंदी ।जलदी थई परभात ने ।
रोंदी उमर वेहानी सारी ।यार न पायम झात ने ।
पुनल है मसजूद दिलीं दा ।दीन ईमान दी बात ने ।
अहद ते अहमद फ़रक न कोई ।वाहद ज़ात सिफ़ात ने ।
हुसन परसती ते मैखवारी ।साडी सूम सलूत ने ।
फ़कर फना दा राह अड़ागा ।तिन्न लक्ख लक्ख आफ़ात ने ।
ठडड़े साह ते हार हंझू दे ।मुतड़ी इशक सुगात ने ।
साड़े सूल फ़रीद दी संगत ।दरद कशाले सात ने ।

जिथ थलड़ा, जिथ दरबूं है यार ।उथ हर वेले लदबूं है यार ।
तडड़े चीकन गीरे घूकिन ।जरखां तरखां लूम्बड़ कूकिन ।
गेंही शूकिन, सानूं फूकिन ।नांगी दी शूं शूं है यार ।
सोहणियां ठेड़ियां टिबड़े भिटड़े ।नाजो वाले ककड़े वटड़े ।
पांही, थोभे, पाड़े, घटड़े ।डिठड़ीं डुखड़ा वूं है यार ।
कंडरी काठीं नशतर मारी ।समझूं यारी ते ग़मखवारी ।
अलड़ी फटड़ी तों रत जारी ।खास सुहाग दी पौ है यार ।
हन खिले हासे साडे पेशे ।सूल सड़ापे दरद अन्देशे ।
ज़ीरे ज़खम ते ज़खमी रेशे ।सब डुख डितड़ा तूं है यार ।
रोही महज़ बशारत दरसों ।मरसूं, भुरसूं, मूल न ड्रसूं ।
बेदरदां दी दिलड़ी तरसूं ।डेंह रातीं घौं, मौं है यार ।
जै डेंह होत नीते पट देरे ।शहर भंभोरों सखत परेरे ।
दिल दियां बोटियां हां दे बेरे ।सानी दी मूं मूं है यार ।
तौं बिन यार फ़रीद दा जीवन ।जीदीं जग विच डुखड़ा थीवन ।
ज़हर डस्यो ए खावन पीवन ।तैडे सिर दी सौं है यार ।

जोसी तूं पोथी फोल वे ।वससी कडां सोहणां कोल वे ।
रो रो थक्की पिट्ट पिट्ट हुट्टी ।के डे वेसां डुक्खड़ीं कुट्ठीं ।
सूलां लुट्टी दरदां मुट्ठी ।माही पुन्नल ग्युम रोल वे ।
पांधीं पुच्छां वाटीं तकां ।सड़ सड़ भुज्जां भुज्ज भुज्ज पकां ।
टुर टुर भुज्जां भज भज थक्कां ।सुंज बर रुलायम ढोल वे ।
जीड़ां ग़मां विच्च वड़ ग्या ।डुक्ख उड़ ग्या सुख लुड़ ग्या ।
दर्या गजब दा चढ़ ग्या ।सौ झोल लक्ख लक्ख छोल वे ।
सिक साथ सावल दी सदा ।दरदों ना थीउम दिल जुदा ।
शाला पुन्नल मेलम ख़ुदा ।जिन्दड़ी घत्तां मैं घोल वे ।
ज़ाहद वट्टा हुन जोल वे ।बिरहों चबोलां बोल वे ।
पतरी परम दी खोल वे ।दिल्लड़ी असाजड़ी चोल वे ।
डखां नेंह अनोखा राज़ वे ।तत्ता सोज़ दे हत्थ साज़ वे ।
मुट्ठी धां फ़रीद आवाज़ वे ।हू हू मलामत दोल वे ।

कहां पाऊं कहां पाऊं यार ।
जिन इनसान मलायक सारे ।क्या सगला संसार ।
हैरत दे कुलज़म विच कुलथीए ।मुसतगरक सरशार ।
सूफी शागल ग्यानी ध्यानी ।गए ओड़क सभ हार ।
अरशी अते बसतामी गल लग ।रोवन ज़ारो ज़ार ।
बतलीमूस ते रीसा गौरस ।कर कर सोच बचार ।
खोज सुराग न पाया पता ।थक बैठे तन मार ।
बुध मजूस यहूद नसारा ।हन्दू ते दीनदार ।
आखन पाक मनज़ह है ।बे अंत अलख अपार ।
पीर पैगम्बर गौस कुतब ।क्या मुरसल क्या औतार ।
करन मनादी रो रो के ।ला यद कक्हअल अबसार ।
आलम फाजल आरफ कामल ।इजज़ कीता इकरार ।
आख फ़रीद नमाना भोला ।तूं विच कौन कतार ।

कहीं डुक्खड़ी लायम यारी ।रोंदी उमर गुज़ारिम सारी ।
सोहने होत बलोच अवैड़े ।डाढे कीते सख़त नखेड़े ।
न सुध सलाम सनेहड़े ।केडे वैसां सूलां मारी ।
एहो रावल रांझन माही ।खस्स दिल्लड़ी थीदां राही ।
वल करदा बे परवाही ।वाह जुलम ते बे नर वारी ।
महींवाल नेहाल न कीतम ।छड्ड कलढ़ी नाल न नीतम ।
भर जाम डुखांदा पीतम ।पेश आई शहर खवारी ।
सर आया बिरहों बखेड़ा ।डेंह रात हमेशा झेड़ा ।
प्या खावन आविम वेहड़ा ।ढोले असलों महज़ वसारी ।
जी जानी कारन लोहदा ।ग़म दरद अलम नित्त कोंहदा ।
गल हार ग़मां दा सोंहदा ।सर सेहरे मूंझ मुंझारी ।
माही आन वसावे झोकां ।क्युं करन स्याली टोकां ।
मैडियां सबज़ थीवन वल सोकां ।वंजां वारी लक्ख लक्ख वारी ।
सै रोग हज़ार कशाले ।तैडे कारन जिन्दड़ी जाले ।
थल मारू पर्रबत काले ।लाचार तत्ती हुन हारी ।
जैं दिलबर दी दिल बर दी ।तैंह बाझ फ़रीद न सरदी ।
जुड़ लायस चोट अन्दर दी ।वाह ज़खम कुलल्लड़ा कारी ।

कैं पाया बाझ फ़कीरां ।जज़बा-ए-इशक की लज़्ज़त को ।
कुल शै विच्च कुल शै डिठोसे ।हमा ओसत दा दरस कितोसे ।
बरकत सुहबत पीरां ।पी कर बादा वह्हदत को ।
जब मदहोशी नाज़ डिखाया ।उरबानी ने रंग जमाया ।
खिरका पाड़ लवीरां ।पहनियम रिन्दी ख़लकत को ।
दरद मन्दां कूं दरद सलामत ।बार मुहब्बत पंड मलामत ।
दुख दुख़ उठदियां पीड़ां ।घोल घतां सब राहत को ।
हुसन फ़रीद कई घर लूटे ।रुलद्यां फ़िरद्यां जंगल बूटे ।
सै सस्सियां लक्ख हीरां ।डेखो इशक दी शिदत को ।

कल्हड़ी रोल मल्हेर ग्युं ।यार वला हुने हुने वागां ।
रोह जबलड़े औखड़े ।डुक्खड़े थल्लड़े झागां ।
कदम कदम ते ढै पौवां ।दिल्लड़ी लगड़ियां लागां ।
रोही वुट्ठड़ी घा थए ।मट्टड़ीं लगड़ियां जागां ।
गांईं सहंस सवाईआं ।सै सै चरन कुरागां ।
सिंधड़ी डुक्खड़े घाटड़े ।रोही मलड़े भागां ।
लाने फोग फुलारीए ।रल मिल चारों डागां ।
डैहां डोड़े डोड़ापड़े ।राती रोंदी जागां ।
संगियां सूरतियां मिल मिला ।सुरख़ियां कज्जल मसागां ।
मैले वेस सुहाउंदे ।फेरी कंड्ह सुहागां ।
दरद फ़रीद उजाड़्या ।डुक्खड़े डितम डुहागां ।

कां को को करलाऊंदा है ।कोई कासद यार दा आउंदा है ।
रुत्त सावन दी डेह मल्हारी ।बाद समाली किन मिन जारी ।
बुई लानी खिप ख़ूब फुलारी ।करड़ कंडा सब भाउंदा है ।
आस आई ते यास सिद्धाई ।झुड़ बादल आ झुड़मुर लाई ।
उजड़ियां झोकां ख़ुनकी चाई ।ग़म डर डर लुक पौंदा है ।
मींह बरसात ख़ुशी दे वेल्हे ।छेड़न छेड़ व छांग सवेले ।
आपे दिलबर कीते मेले ।जैं बिन जी तड़फाउंदा है ।
टिब्बे रेखां थल ते डहर ।कुल गल डिसदे अहमर असफ़र ।
डुक्ख कशाले गुज़रे यकसर ।सुक्ख रग रग विच्च धौंदा है ।
डुख डुहाग दा वकत वेहाया ।भाग सुहाग दा वेल्हा आया ।
यार फ़रीद अंगन पोंपाया ।हार सिंगार सहाउंदा है ।

करन नज़ारे तेज़ नज़र शाला जीवें ।नूर वजूद अयाने ।
सर्रे सुबहानी राज़ अनलहक ।रिन्दी विरद लिसाने ।
विरद मबानी कशफ मुआनी ।अहल देलोंदा शाने ।
समझ सुंजानी गैर न जानी ।सब सूरत सुबहाने ।
अव्वल आखर ज़ाहर बातन ।यार अयान ब्याने ।
कत्थ मनसूरी ते तीफूरी ।कत्थ सरमद सनआने ।
हुसन परसती शाहद मसती ।साडा दीन ईमाने ।
राह तौहीदी रीत फ़रीदी ।अपने आप दा ध्याने ।

कर यार असां वल आवन्नडी ।अज्ज सहज कनूं अख फुरके वो ।
गुजरी डुक्ख डुहाग़ दी वारी ।रोही गुल फुल नाल सिंगारी ।
मुद मसतानी डेंह मलारी ।बाद शमाली लुरके वो ।
कीती भाग सुहाग उतावल ।रुत आई कर तुरत उबाहल ।
किन मिन कणियां रिम्म झिम्म बादल ।बारश बुरके बुरके वो ।
सिधड़ी थई वल किसमत पुट्ठड़ी ।आपें मनड़ी राहत रुट्ठड़ी ।
सोहनी मौसम रोही वुट्ठड़ी ।वहशत डूं दिल सुरके वो ।
ठडरियां हीलां पूरब वालियां ।कज्जले बादल लस्सड़ियां कालियां ।
संगियां सुरतियां नूं खुशहालियां ।हक्क वैरन पई कुरके वो ।
आपे यार फ़रीद संभालिअम ।सोहने सांवल प्रीतां पालिअम ।
बखती सुंजरी टालिअम ।जी मुसके दिल मुरके वो ।

कौन किरम निरवार तेग बिरहों दी कुट्ठियां कुट्ठियां ।
अनहद बीन बजा मन मोहस ।गवल जोगी लुट्टियां लुट्टियां ।
गज़ हकीकी फाश डिट्ठोसे ।इलमो अमल तों छुट्टियां छुट्टियां ।
इशक नहीं है आग गज़ब दी ।धां करेंदी हुट्टियां हुट्टियां ।
कल्हड़ी छड्ड के केच सिधायउं ।अक्खीं मलेंदीं उट्ठियां उट्ठियां ।
जाम ज़हर दे ज़ुलम कहर दे ।दरद पलेंदा घुट्टियां घुट्टियां ।
इशक फ़रीद नहीं अज्ज कल दा ।रोज़ अज़ल दे दी मुट्ठियां मुट्ठियां ।

केच ग्युं यार बरोचल ।कल ना लधड़ो सावल वल ।
मिसरी खंज नबातड़ी ।डिसदियां ज़हर हलाहल ।
घोले ज़ेवर भा लगे ।बठ पए डोरे मलमल ।
जोभन जोश जवानड़ी ।नाज़ नहोरे गए गल ।
कपड़े लीर कतीरड़े ।लिंगड़ी जाई मिलजल ।
अक्खियां कजलों कालियां ।पेची ज़ुलफ वलो वल ।
यो दिल चोट चलांदियां ए थी फाई पए गल ।
डिठम मलक मल्हेर डूं ।काले काले बादल ।
सिंधड़े रहन न डेंदियां ।लगड़ियां ताघा पलपल ।
रोही मेंघ मल्हरड़ा ।खमदियां खमनियां अजकल ।
दिलड़ी सिदकी देस डूं ।अखड़ीं हंझणूं बलबल ।
डेखां बाग बगोचड़े ।जियड़ा जानविम जलबल ।
लाने फोग फ़रीद दे ।दरद दलेंदे दरमल ।

किस धरती से आए हो तुम ।किस नगरी के बासी रे ।
परम नगर है देस तुम्हारा ।फिरते कहां उदासी रे ।
क्युं होते हो जोगी भोगी ।रोगी तरह बरागी रे ।
अंग भभ्भूत रमा के क्युं कर ।रखते बदन सन्यासी रे ।
अपना आप संभाल के देखो ।करके नज़र हकीकत की ।
फ़िकर न कीजो यारो हरगिज़ ।आसी या न आसी रे ।
तुम हो सागी तुम हो सागी ।वागी ज़रा न वागी रे ।
अपनी ज़ात सिफ़ात को समझो ।अपनी करो शनासी रे ।
बात फ़रीदी सोच के सुण्यु ।लाकर दिल के कानों को ।
दोनो जग के मालक तुम हो ।भुले अल्ला-रासी रे ।

किवें तूं फरद ते जुजव सडावें तूं कुल्ल तूं ।
बाग बहशत दा तूं हैं मालक ।खुद बुलबुल खुद गुल ।
अरश वी तैडा फरश वी तैडा ।तूं आली अणमुल ।
चढ़ दारी मनशर दे भाई ।करन अजब गुलगुल ।
रूह मिसाल शहादत तूं हैं ।समझ संजान ना भुल ।
दुनिया उकबा बरजुख अन्दर ।नाहीं तैडरा तुल ।
यार फ़रीदा कोल है तैडे ।ना बेहूदा रुल ।

कोई माहणूं आए मैं यार दा ।साथी खड़ा सनेहड़ा डेंदा ।
इशक नहीं है तीर बला दा ।ज़ुलमीं चोट चलेंदा ।
नाज़ अदा कुझ करे न टाला ।हुकमी बिरहों बछेंदा ।
रमज़ रमूज़ ते गुझड़े हासे ।सभ कुझ दरद सझेंदा ।
सोज़ फराक ते दरद अन्देशे ।तन मन फूक जलेंदा ।
हरगिज़ सूल न सहन्दी दिलड़ी ।यार ऐ बार सहेंदा ।
हज़र फरीद कीती दिल ज़खमी ।दोसत न मरहम लैंदा ।

कुल ग़ैर कनूं जी वांदे ।मुट्ठी रीत अनोखी रांदे ।
सट्ट कर खवेश कबीला थ्योसे ।बरदे तैडड़े नां दे ।
सब सूरत विच्च ढोल संजानो ।थ्यो व ना दरमांदे ।
सीने झोकां दीदीं देरे ।सोहने दोसत दिलां दे ।
हर पल पल विच्च कोल बगल विच्च ।यार मिट्ठे मन भांदे ।
अक्खियां दे विच्च कतर न मावे ।सारे सज्जन समांदे ।
शाला वंज कर हज़रत रोही ।डेखूं घर मित्तरां दे ।
सट्ट कर विरद फ़रीद हमेशां ।गीत परम दे गांदे ।

क्या डुख़्ख़ड़ा नेंह ल्युसे ।डुक्ख बाझ पल्ले न प्यु से ।
इशक नहीं है नार ग़ज़ब दी ।तन मन कीतुस कोले ।
सूलां सड़दीं आही भरदीं ।सारी उम्मर निभ्युसे ।
ना गमख़ार ना कोई साथी ।ना कोई हाल वंडावे ।
इशक जेहां डुक्ख होर न कोई ।मा प्यु वैरी थिओसे ।
ख़वेश कबीला हर कोई जाने ।मंज़िल यार दियां झोकां ।
सेंगियां सुरतियां करदियां टोकां ।सारा भरम लुढ़ओसे ।
गलियां कूचे शहर बज़ारां ।लोग मरेंदा काने ।
नंढड़े वडड़े डेवन ताने ।शरम शउर वंज्युसे ।
गाल्ह नहीं अज्ज कल दी सुंजड़ी ।रोज़ अज़ल दी मुट्ठड़ी ।
बे निशान सज्जन दे कीते ।नास निशान गंव्युसे ।
हार हंजूं दा गल विच्च पावां ।बैठी रो रो हाल वंजावां ।
पीत सुवा बई रीत न काई ।डे सिर मुफ़त राध्युसे ।
मूंझ मुंझारी दरद विछोड़ा ।लिख्या बाब तत्ती दे डोड़ा ।
यार फ़रीद ख़रीद न कीता ।रो रो ख़लक रुव्युसे ।

क्या हाल सुणावां दिल दा ।कोई महरम राज़ न मिलदा ।
मुंह धूड़ मिटी सिर पायम ।सारा नंग नमूज़ वंजायम ।
कोई पुछन न वेहड़े आइम ।हथो उलटा आलम खिलदा ।
आया बार बिरहो सिर बारी ।लगी हूं हूं शहर खवारी ।
रोंदी उमर गुज़रेम सारी ।ना पायम डस मनज़ल दा ।
दिल यार कीते कुरलावे ।तड़फ़ावे ते गम खावे ।
डुख पावे सूल निभावे ।एहो तौर तैंडे बेदिलदा ।
कई सहंस तबीब कमावन ।सै पुड़ियां झोल पलावन ।
मैडे दिल दा भेद न पावन ।पवे फरक नहीं इक तिलदा ।
पुनूं होते न खड़ मुकलाया ।छड कल्हड़ी कीच सिधाया ।
सोहने जान पछान रोलाया ।कूड़ा उजर नभायम घिलदा ।
सुन लेला धांह पुकारे ।तैंडा मजनूं ज़ार नज़ारे ।
सोहना यार तूने हिकवारे ।कडी चा परदा मुहमल दा ।
दिल प्रेम नगर डूं तांघे ।जथां पैंडे सखत अड़ांगे ।
नाराह फ़रीदन लांघे ।पंध बहूं मुशकल दा ।

क्या इशक अड़ाह मचाया है ।हर रोज़ इह सोज़ सवाया है ।
सर तन मन फूक जलाया है ।मुट्ठा जोबन मुफ़त गंवाया है ।
भैड़ी दिल्लड़ी मार मुंझाया है ।दम दम विच्च दरद सवाया है ।
सट्ट सेझ इकेली होत नस्से ।ग़म पा कर झोली ऐश ख़स्से ।
गल हार फुलां दा नांग डिस्से ।डुक्खी किसमत सब डुक्ख लाया है ।
सोहना सांग हिजर दी मार ग्या ।यकबारी यार वसार ग्या ।
कर ज़ार नज़ार खवार ग्या ।तत्ती बे वस्स बार सहाया है ।
एहा दिल्लड़ी इशक दी कुट्ठड़ी है ।जैं सबर आराम वंजाया है ।
मा डित्तड़ी शौक दी गुट्ठड़ी है ।जैं सबर आराम वंजाया है ।
दिल लावन हाल वंजावन है ।सुख डेवन ते डुक्ख पावन है ।
ग़म खावन दरद निभावन है ।नेड़ा बेशक कूड़ा जाया है ।
सोहने बाझ फ़रीद करार ग्या ।कंम कार सभो घर बार ग्या ।
सब नाज़ नवाज़ संगार ग्या ।सर बार डुहाग सहाया है ।

क्या रीत परीत सिखाई है ।सब डिस्सदा हुसन ख़ुदाई है ।
डिस्सदी यार मिट्ठल दी सूरत ।कुल तसवीर अते कुल मूरत ।
हर वेले है शगन महूरत ।ग़ैर दी ख़बर न काई है ।
नाज़ नेहोरे यार सज्जन दे ।इशवे ग़मज़े मन मोहन दे ।
हर हर आन अनोखड़े वन्दे ।वाह ज़ीनत ज़ेबाई है ।
नख़रे नख़रे नोकां टोकां ।दिल्लड़ी जोड़ चुभेंदियां चोंकां ।
सोकां सबज़ थियां वल्ल झोकां ।ख़ूबी ख़ुनकी चाई है ।
नाज़क चालीं नूर नोल दी ।रमज़ां बाकी तरज़ जदल दी ।
धाड़ कज्जल दी धाड़ा जलदी ।सुरख़ी भा भड़काई है ।
डुक्ख डुहाग ते दरद जुदाई ।रल मिल वैंदे साथ लडाई ।
इशक फ़रीद थ्युसे भाई ।इशरत रोज़ सवाई है ।

क्या थ्या जो तैडी न बनी ।थीसी ओहा जो रब्ब गिनी ।
दौलत कूं चूची ला अड़ा ।ठग बाज़ दा डटको न खा ।
आज़ाद थी सफन सफ़ा ।चुन घिन सुंजाएंदी अनी ।
दुनियां दा न थी आशना ।है ए मकारा बे वफ़ा ।
खावीं न मुज़िन दा दग़ा ।है पंज कनी तैकूं घनी ।
धज्ज वज्ज दी झग्ग मग्ग तरोड़ वे ।डोरे भे मलमल छोड़ वे ।
है डिल्ह पत्थर दी भोर वे ।तैं कान हीरे दी कनी ।
मुलां नहीं कहीं कार दे ।शेवे न जाणिन यार दे ।
समझन न भेत इसरार दे ।वंज कंड दे भरने थए दनी ।
ईं राह डो आंवी ना हा ।जे आईं कदम डेहों डेंह वधा ।
पिछों ते ना डेखीं मूंह वला ।हीला करीं सर तईं तनी ।
निञ्ही तरस बारोचल रती ।रोहीं पहाड़ी विच तत्ती ।
शोदी सस्सी रुलदी वत्ती ।नेहीं अल्हड़ी हिक्क जनी ।
है वल कहर दी मुबतला ।है ओ गज़ब दा बे वफ़ा ।
मन छड्ड अते मन डे विया ।आपत दे विच्च खड़बड़ बनी ।
सुन बेवफा दी गाल्ह वे ।पुछदे न हरगिज़ माल वे ।
असलों न लहम संभाल वे ।डेवे न चोली दी तनी ।
थी ख़ुश फ़रीद ते शादवल ।डुख़ड़ीं कूं न कर याद वल ।
अझू थीवम झोक आबाद वल ।एहा नैं न वैहसी हिक मनी ।

क्युं लोड़, कल्हड़ी विच्च कुन कपरदे ।रोधे डितो नी पिछली उम्मर दे ।
तैं बाझ जीवें असलों न जीवां ।तैडे अख़्ख़ीं दे साहमे पुरीवां ।
मारू, मरीला, भौं बिन ना थीवां ।बट्ठ डेंह हिजर दे औखे गुज़रदे ।
मारां मरोड़ा धक्कड़े ते धोड़े ।भेजियां सौगातां तैडे विछोड़े ।
डुक्खड़े डेंहों डेंह डेढे ते डोड़े ।है है न जींदे जियड़ा न मरदे ।
गए वकत वेल्हे यारो भलेड़े ।डुक्खड़े डुक्खी ते कीते वहीरे ।
शाला डेहाड़े थीवम थुलेरे ।पाड़े गुज़ारूं सजणीं दे घर दे ।
घोली तुसैडी गोली तुसैडी ।डे कन ते सुणीं पीड़ मैडी ।
पानी असाडा थई रत्त असेडी ।रोटी है टुक्कड़े हां दे जिगर दे ।
मुंढ लादी जिन्दड़ी डुखड़ेंदी डोहड़ी ।दरदेंदीं बद्धड़ी सोज़ेंदी रोहड़ी ।
हक्क तूं तत्ती दी वल्ल कल न लधड़ी ।पए सूल सदमे चौथे पहर दे ।
रह ग्युम खुशियां विसरे ननढेपे ।धां धां करदे आए बुढेपे ।
थए बेनवाई डित्तड़े रंडेपे ।आए बार सिर ते बारी कहर दे ।
जोगी बरागी थीकर ढूंडेसां ।कफ़नी डुक्खां दी पागल सुहेसां ।
एवें फ़रीदां उमरां नभेसां ।जे तईं ना थीसां दाखल कबरदे ।

लज्ज लोई कीं उतारेंदस ।तुहंजा नहमल भा मैं बारेंदस ।
तुहंजा ज़ोर ज़लल औं मकर वदगा ।
तुहंजे ज़ुलम जयां गार्हेउ उमरादा ।
वंजीं वेहेड़ीजन सां गारेंदस ।
थर नप्हवारन जा डेस वतन ।
थर आहे संहज़ा मुलक वतन ।
खुश सेंगी सां गुजारेंदस ।
हन कैद में केढ़ो कामक्यां ।
साला मारन वारे नहन वयां ।
जा थी वार उगार बुहारेदस ।
हुजै हरदम डेंह अबाने मेंह ।
आहे सिक साड़्या जे रातीं डेंह ।
वैठी धां कन्दस हंजूं हारेंदस ।
बठ माड़्यों औं महलात जा घर ।
आखे मरक फरीद जा मारूथर ।
वहन सांगे अड़न जे चारेंदस ।

माडी दिलड़ी अड़ी ।होत पुनल दी सांग ।
सट कर खवेश कबीलड़े ।सिक सांवल दी सांग ।
रग रग ज़ुलफ दे पेचड़े ।नांग अजल दे सांग ।
विसरे इशक मजाज़ड़े ।हुसन अज़ल दी सांग ।
तांघ फरीद कूं रोलदी ।मारू थल दी सांग ।

माडी दिलड़ी अड़ी ।यार सजन दे सांग ।
जैंदी मेला रब करम ।जोह जतन दे सांग ।
नाज़ व ढोल दे नाज़ वे ।हर हर वन दे सांग ।
भुलड़े सकड़े सोहरड़े ।मन मोहन दे सांग ।
लानी फोग फुलारी ।सब पन पन दे सांग ।
वकत ज़ईफ बुढेपड़े ।सन जोभन दे सांग ।
तांग फ़रीद कूं आखदी ।बैत हज़न दे सांग ।

मान महीं दा चाक ।असाडे मन भांवदा ।
हरदम होवीं कोल मैंडे ।कर रखां दिल-पाक,
वतां गलक्कड़ी पांवदा ।
रातीं रोंदी पिटदी खपदीं ।फट गई हम बाख,
क्युं गल नहीं लांवदा ।
सांवन सहजों मेघ मल्हारां ।आई मिलन दी मद साख,
नेहड़ा जीड़ा तांवदा ।
दरदों ठडरियां साहीं कढ्ढदी ।रो रो डेवां बाक,
डुक्खड़ा अंग न मांवदा ।
नाल फ़रीद दे सच्च ना कीतो ।आवन दी ग्यों आख,
सो हुन वल नहीं आंवदा ।

माही बाझ कलल्लियां ।दिलदार बगैर अवल्लियां ।
माही झोक लडाई वैंदा ।सारा हिजर दे रलियां ।
तरस न आवे हिक तिल तैनूं ।सख़त ग़मां विच्च गलियां ।
वेड़ा खावे अंगन न भावे ।अग्ग फ़राक दी जलियां ।
शरम वंजायम भरम गंवायम ।रुलदी कूचे गलियां ।
इशक फ़रीद बहूं डुक्ख डेसम ।अज्ज कल मोई मोई भलियां ।