१

वड्डड़े वेले उठी के सईआं साज़ वज़ू बैठियां घबकावन सैं ठहावन ।
ते जड़ जड़ लांवन मैल मख़न पैंडियां डोले डेन सुग़ात चलावन ।
मैं जेहियां बदकार निकम्मियां यार फ़रीद ओदियां दर दर नोट भनवावन ।
अज़लों भाग तिन्हां दे मत्थे जेहड़ियां सेज ते यार मनावन ।

२

उड्ड वे कागा काल्या तूं तां छड्ड असाडी बेर ।
तूं तां बैठां करदा है बातियां मैंडे अंलड़े ज़खम न छेड़ ।
तैनूं कुट्ट कुट्ट घतसां चूरियां तूं तां मंगी दुआईं ढेर ।
फ़रीदा उड्डीना रब्ब करे चले वंजो मदीने दी सैर ।

३

सावन माह सुहेला आया ते वणजारे घुम्मे पए डेवन मसाग दे होके ।
उह मसाग ख़रीद करन जिन्हां दे पल्ले रकम रोके ।
उह की मलन मसाग करमां दियां मारियां जेहड़ियां सेज ते सुत्तियां रो के ।
यार फ़रीदा चल वतन चलाहीं क्युं लाई परदेस विच्च झोके ।

४

यार रुझावन सिख वे मुलां ब्यां स्ट्ट घत सब दलीलां ।
इशक मज़ाज़ी ते मुशकल बाज़ी कंम नहीं बख़ीलां ।
सिर ते भड़के ढांड हिजर दा ओ वी समझी ठंडियां हीनां ।
यार फ़रीद जथां अक्खियां लगियां अथ हाजत नहीं वकीलां ।

५

मुफ़त ख़रीद करे कोई असा कूं ते हाल डेवे सजणां दा ।
जै डेहाड़े दे सजन लड्ड सिधाए वैंदा ज़ोफ़ अन्दर कूं खांदा ।
सै मलमां पट्टियां बन्न्ह बन्न्ह हट्टियां ते ज़खम खड़ा चचलांदा ।
बाझों पीर फ़रीदन यार दे साडी अदन कोई नहीं लांहदा ।

६

इशक तैंडे दी नहर वगे कई तरियां करमां वालड़ियां ।
कई कोझियां लंघ पार गईआं ते रोवन शकलां वालड़ियां ।
शकलां डेख न भुलीं बाहरों चिट्टियां ते अन्दरों कालड़ियां ।
यार फ़रीद चा भाल भाले ऐबां वालियां दे मत्थे लालड़ियां ।

७

अज़लों डाज ढ्यावन अम्मड़ी अखीं नीरां नीरां ।
ज़ीरा पार लवीरा कीता इन्हां कोट मिट्ठन द्यां तीरां ।
लोक आखन हीर रांझन दी मै पीर फ़रीद दी हीरां ।
बाझों पीर फ़रीदन यार दे मैंडियां कौन लहम दिल धीरां ।

८

चाचड़ वांग मदीना जातम अते कोट मिट्ठन बेत अल्ला ।
रंग बिना बेरंगी आया कीतम रूप तजल्ला ।
ज़ाहर दे विच्च मुरशद हादी बातन दे विच्च अल्ला ।
नाज़क मुक्खड़ा पीर फ़रीद दा सानूं डिसदा वजा अल्ला ।

९

वकत जनाज़े मियां रांझा मैंडियां आप पढ़ाईं तकबीरां ।
इस वेले मैं जैंदी होसां करके कफ़न लवीरां ।
लीरां दी बह कफ़नी सीवां रुलां हाल फकीरां ।
हसाब किताब मैंडा रांझा लैसी कुझ हाजत नहीं नकीरां ।

१०

ख़ुदा ख़ुदा भी सुनदे हा से डेखन दे विच्च आया ।
इनी ते मन इनी बण आप नबी फ़ुरमाया ।
रांझड़े राज अनोखे सानूं माही है समझाया ।
नाज़क वी दिल लुट्टन कारन बण पीर फ़रीद न आया ।

११

घर घर दे विच्च धुम्मां पईआं हुसन रंझेटे यार दियां ।
कई हीरां विच्च झंग कुरलावन जेहड़ियां होनो तन वार दियां ।
कई सस्सियां रुलियां विच्च थलां दे जेहड़ियां तालब हुन दीदार दियां ।
कई सोहणियां डुब्बियां विच्च नै चंचल दे महींवाल दा नां पुकार दियां ।

१२

रोज़ अज़ल दी दर दिलबर दी कीमत इशक ग़ुलामे ।
तांग तंगेदी कांग उडेंदी रोवां सुबह व शामे ।
न कोई ख़त दिलदार दा आया न कासद पैगामे ।
आख़ फ़रीद दिल दरदों मांदी हुन मुट्ठड़ी बेआरामे ।

१३

इशक मज़ाजी नूर हजाज़ी बोस कनार दे तमीं ब्या क्या कम ए ।
धूआं लाऊं यार दे दर ते गालड़ां हड्ड ते चंमीं ब्या क्या कम ए ।
दिल विच्च सोज़ हज़ार दुखां दे मार मुकाया ग़मीं ब्या क्या कम ए ।
आख फ़रीद मैं जोगन बण ते फिरसां उभे लंमीं ब्या क्या कम ए ।

१४

सुंजड़ी किसमत न यार आया ते पईआं ख़बरां दिल दियां ।
अक्खियां नीर बरसात सावन दी जिवें नहरां चलदियां ।
दरद फ़राक ते सोज़ हिजर दे पई विच्च कुठाले गलदियां ।
आख फ़रीद रब्ब खुशियां डेवे अजां मुंझां न पईआं टलदियां ।

१५

सुरख़ी कज्जला नाज़ नहोड़े साको वल वल खून करेंदे ।
कीता कैद मुहब्बत साकों चा दिलबर मूंह लोकेंदे ।
सोज़ों सोज़ ते दरद पुकारां न दिलबर गल लैंदे ।
आख फ़रीद हुन मैं मुट्ठड़ी कूं क्युं डेस प्रदेस रुलेंदे ।

१६

हर वेले तांघ दिलबर दी रो रो काग उडारां ।
फालां पावां कासद भेजां थी ग्या हाल बीमारां ।
यार बाझों हुन जीवन कूड़े अन्दर दरद हज़ारां ।
ग़ुलाम फ़रीद मैं रोवां एवें जिवें विच्छड़ी कूंज कतारां ।

१७

हक्क हिक्क नाज़ दिलबर दे साकों कीता चा ख़रीदे ।
रुख दिलबर दा साडे वासते चांद मुबारक ईदे ।
दिलबर कोल आखेंदे वसम फरहत महज मज़ीदे ।
बांदा बरदा तैं दिलबर दा हरदम गुलाम फ़रीदे ।

१८

कज्जले सुरख़ी मार मुकाया चा दिलबर दिल्लड़ी लुट्टी ।
नैन अवैड़े जादूगर हन पई नाज़ां दी कुट्ठी ।
आराम तमाम ग्या काई एझीं बरछी इशक दी छुट्टी ।
यार फ़रीद आ संभाले करे हार संगार वल मुट्ठी ।

१९

अक्खीं साडियां कदम तुसाडे
बद्धी वफ़ा दी कसम ख़ुदा दी ।
सीना साडा सेज तुसाडी
लेट सोहना दिल आह दी कसम ख़ुदा दी ।
जिन्दड़ी जान हवाले कीतम
जानी जम्मदीं लादी कसम ख़ुदा दी ।
आख फ़रीद वल सांगे थीवन
हासल फ़रहत ज़्या दी कसम ख़ुदा दी ।

२०

लक्ख लक्ख वारी सदके थीवां दिलबर यूसफ़ सानी ।
दिल दा महरम राज़ असाडा ज़िन्द करां कुरबानी ।
डे दीदार लाचार फिरां मैं लाययो हिजर दी कानी ।
यार फ़रीद नूं मिल हिक्क वारीं हैरान फिरां दिल जानी ।

२१

उड्ड वंज कांगा दर सजनां ते अज्ज दिल्लड़ी मूंझी मांदी ।
फालां पावां नीर वहावां कई दिल दी ख़बर न आंदी ।
इंतज़ारी बेकरारी दिल जुदाई न सहन्दी ।
यार फ़रीद आवम हिक्क वारी वतां कूंज वांगे कीरने करदी ।

२२

बट्ठ प्या सुरमा सुरखी कज्जला बट्ठ प्या हार संगारे ।
संगियां सई्ईआं नित्त सतावन मा प्यु वीरन मारे ।
सै सै मिन्नतां ज़ारियां कीतम रहन्दा यार बेज़ारे ।
आख फ़रीद यार ने रोल्या हुन रोणों नाल वपारे ।

२३

दिलबर आवे चा गल लावे मुट्ठी हरदम मंगदी दुआईं ।
किसमत भैड़ी डित्तड़े रोले निकलन दरदों आही ।
कहीं घड़ी आराम न आवे रोंदी संज सबाहीं ।
आख फ़रीद न कहीं दे शाला निखड़न यार कडाहीं ।

२४

दिलबर आवे चा गल लावे मुट्ठी हरदम मंगदी दुआईं ।
किसमत भैड़ी डित्तड़े रोले निकलन दरदों आही ।
कहीं घड़ी आराम न आवे रोंदी संज सबाहीं ।
आख फ़रीद न कहीं दे शाला निखड़न यार कडाहीं ।

२५

कसम ख़ुदा दी दर दिलबर दा हरगिज़ छोड़ न वैसूं ।
इनशाअला जींदियां ताईं पूरी तोड़ निभेसूं ।
दिलों बजानो जिन्दड़ी सदके असलों फ़रक न पैसूं ।
आख फ़रीद हां ख़ाक कदमां दी थी ग़ुलाम जलेसूं ।

२६

दरदां मारी रो रो हारी नहीं पए आंदे दोसत दिलेंदे ।
जिवें दिलबर मैं नाल कीती इवें दुशमन न करेंदे ।
सुंजर थल, हबल दे विच्च क्युं वल वल रोले डेंदे ।
यार फ़रीदा मंगां दुआईं न निखड़न यार कहेंदे ।

२७

मौसम सावन रोही वुट्ठड़ी टोभा तार मतारां ।
माल मवैशी बकरियां गाईं छिड़ दियां थी कतारां ।
घुंड सुहावन दिल कूं भावन निकलन सोज़ तवारां ।
हक यार फ़रीद दम नाल होवे क्युं दरदों दरद पुकारां ।

२८

रोही वुठड़ी तत्तड़ी मुट्ठड़ी टुर पोसां पैर प्यादी ।
उच्चड़े टिब्बड़े हुन कोह तूर ते दिल कूं फ़रहत ज़्यादी ।
वंज दिलबर दे कदमीं ढैसां ते बद्धी प्रीत वफ़ादी ।
गट्ठड़ी इज़ज न्याज़ फ़रीदा प्रीतम जम्मदी लादी ।

२९

वकत तहजद कई सुहागनी मट्टियां बह घबकावन ।
ला इला इल्ल लिल्ला डे ज़रब मखन कूं चावन ।
पकड़ दामन पीर मनांदा खीर दी जाग जगावन ।
ग़ुलाम फ़रीद पीर कामल बाझों विच्च गफ़लत डुद्ध पठावन ।

३०

इशक मजाज़ी राज़ दी बाज़ी इहो इशक आला नूरे ।
बट्ठ पई दुनियां दौलत सौकत साकूं इशक मनज़ूरे ।
हुसन प्रसती महज़ इबादत दिल बे वस्स मजबूरे ।
ग़ुलाम फ़रीदा समझन आरफ दरअसल हकीकत दूरे ।

३१

सुंजड़ी रोही दिल नूं मोही फिरदी कमलियां वांगे ।
यार मुट्ठी दा नज़र न आदा डेखां हाल दे लांघे ।
नज़र मेहर दी दिलबर भाले रोही पंध अड़ांगे ।
ग़ुलाम फ़रीद यार मिलम हुन रब जोड़े चा सांगे ।

३२

टोभे असाडे दिल कूं भावन खप झौपड़ खुश जाईं ।
लानड़ी फोग करड़े कंडा बोईं कतरन इतर हवाईं ।
रोही गुलज़ार डसीजम दिल कूं लक्ख लक्ख चाईं ।
आख फ़रीद दिल दिलबर लुट्टड़ी न थीसां दूर कडाहीं ।

३३

मुंझ मज़ीद शहीद हमेशा दिलबर डित्तड़े रोले ।
भुल्ल गई सुरख़ी कज्जला साकूं हिजर कनूं तन कोले ।
कप्पड़े मैले लीर कतीरां रुल गए बोछन चोले ।
ए जिन्दड़ी कुरबान फ़रीदा अजे ख़िल हस्स यार चा बोले ।

३४

बट्ठ पई सुरख़ी बट्ठ प्या कज्जला बट्ठ प्या हार सिंगारे ।
क्या धावां ते फल पावां दिड़्ड़ी दरद पूकारे ।
सै जतन सै हीले कीतम न मिलिम सांवल यारे ।
यार फ़रीद कूं कहन्दी मरसां जग डिसदा धूंआं अंधारे ।

३५

हक्को अलफ काफ़ी मुलां बे दी गरज़ न काई ।
अव्वल आख़र ज़ाहर बातन नाल अलफ़ दे लाई ।
न डे डर के अलफ़ कूं फड़के रमज़ अलफ़ समझाई ।
ग़ुलाम फ़रीद दिल अलफ़ लुटी वाह मीम कीती रुशनाई ।

३६

इशक मजाज़ी राज़ अनोखे क्या जानड़न मुलां मलवानड़ीं ।
रमज़ हकीकी आरफ़ समझन नाज़ दिलबर दे भानड़ीं ।
हां मैं कुतड़ी यार दे दर दी जानड़ीं यार न जानड़ीं ।
आख फ़रीद मैडी लूं लूं विच्च चा कीते इशक टिकानड़ीं ।

३७

जमदीं लादी इशक दी गट्ठड़ी शौक प्याले पीते ।
जींदी मोईं हिक्क यार दे रहसों सच्ची पीत प्रीते ।
दर दिलबर दा छोड़ न वैसूं इशक सिखाई रीते ।
आख फ़रीद दिल दिलबर लुट्टड़ी विसरे चाचड़ सदके कीते ।

३८

सिंधड़ों दिल्लड़ी थई उचाके डेखां रोही संजबर कूं ।
दिलबर नाल अख़्ख़ीं दे डेखां नहीं करार सबर कूं ।
चाचड़ महज़ न भांदे दिल कूं रहन्दा सोज़ जिगर कूं ।
आख फ़रीद टुर पैर प्यादी हुन स्ट्ट घत जरूर घर कूं ।

३९

मरवेसां कुरलांदी मुट्ठड़ी अखीं सावन बरसाते ।
सेज सूलां दी लगन कंडड़े सोज हिजर डेंह राते ।
जेहड़े ताअने शहर खवारी डित्तड़े इशक बराते ।
फ़रीदा जमदी मर वंजां हा इहा जिन्दड़ी सूलां वाते ।

४०

सुरख़ी कज्जला हार शिंगार ते बट्ठ पई सेज फुलां दी ।
लगन कंडड़े ढै ढै पवां दरद दी बांह सरांदी ।
बहर ग़मां विच्च लुढ़दी बुड्हदी सै सै गोते खांदी ।
ग़ुलाम फ़रीदा दरद कोकेसां न सल कनूं थियम वांदी ।

४१

नाज़ नेहोड़े इशक दे ग़मज़े डस्स कीं उसताद सिखाए ।
बे परवाही तरीढ़ी मत्थे की ए जींह सबक पढ़ाए ।
सुरख़ी ख़ून जिगर दा पींदी चा कज्जला फ़ौज चढ़ाए ।
समझ फ़रीद कूं ख़ाक कदमां दी इहा दिल्लड़ी महज़ फ़िदा ए ।

४२

थीवां हार तैंडे गल दा दिलबर असलों दूर न थीवां ।
या तैडे पैरां दी थीवां जुत्ती कदमां हेठ मंडीवां ।
इजज़ न्याज़ दी मडी साडी नित्त बांदी यार सदीवां ।
आख फ़रीद तैं रुख दिलबर दा हर दम डेख ते जीवां ।

४३

मेंघ मल्हारां बारस बारां रोही रब्ब वसाई ।
बूटे बूटे घुंड सुहावन सबजियां खतगी चाई ।
फोग बूटी ते लानड़ीं खप वाह नाज़ करेंदी लाई ।
यार फ़रीद वसम पिया कोलों फरहत रोज़ सवाई ।

४४

यार दियां झोकां किबला काबा साडा इशक इमामे ।
दिल विच्च हरदम यार दे देरे क्या सुबह क्या शामे ।
बाझ दीदार वसाल दिलबर दे नैना नन्दर हरामे ।
दर दिलबर दी बांदी बरदी थिया फ़रीद गुलामे ।

४५

सोहण्यां दे विच्च नाज़ नज़ाकत सोहने नाज नेहोड़े ।
इशक दे गमज़े सुरख़ी कज्जला हुसन शबाब दा ज़ोरे ।
हार सिंगार ते ज़ेवर कप्पड़े वाह ! वाह !! नाज़क टोरे ।
इशक फ़रीदा मार मुकायम हुन यार करम चा गौरे ।

४६

मैं रुस्सां तां कैं दर वस्सां जे यार रुट्ठा मरवेसां ।
कसम ख़ुदा दी जिन्द दिलबर विच्च मैं कदमां विच्च जलेसां ।
रुसन मूल न डेसां हरगिज़ पैरीं पै मनेसां ।
ग़ुलाम फ़रीदा इशक दिलबर विच्च मैं पूरी तोड़ निभेसां ।

४७

सोहनी लुढ़ पई बहर ग़मां विच्च लुड़दी बुडदी वैंदी ।
सिक महींवाल बेहाल कीतस ते सै सै बानड़ मरैदी ।
ग़ोते खावे बांह उलारे आख़री विदा करेंदी ।
यार फ़रीद महींवाल दा कलमा पढ़ जिन्दड़ी पई मुकेंदी ।

४८

रांझा तखत हज़ारे दा आया ख़ातर हीर स्याले ।
झंग विच्च देरे माल चरायस मंझी बाग साले ।
जोगी बण के कन्न पड़वायस कीता इशक कमाले ।
डेख फ़रदि फ़कीर दी पालीस जो वाह जोगी लज पाले ।

४९

किबला खवाजा नूर मुहमद साहब शहर मुहारां ।
हन्द सिंध पंजाब दे विच्च चा कीतो फैज़ हज़ारां ।
चिशत बहशत गुलज़ार अजायब चलाईआं फैज़ दियां नहरां ।
ग़ुलाम फ़रीद हम दोसत दिलेंदा सर सदका जिन्दड़ी वारां ।

५०

कासदा मन्न नाम ख़ुदा दा वंज मैंडे यार दी खिदमत ।
बे परवाह पुर नाज़ दिलबर है वंज मैंडे दिलदार दी खिदमत ।
इजज़ न्याज़ ते हाल हकीकत डे ग़म धवार दी खिदमत ।
रहां गुलाम फ़रीद दिल चांहदी गुल रुखसार दी खिदमत ।

५१

जुलफां कालियां हुसन अजायब कीता इशक ख़रीदे ।
कातल चशमां सुरख़ी कज्जला कीतम दीद सहीदे ।
नाज़क टोरे नाज़ नहोड़े लुटरी दिल फ़रीदे ।
बांदा बरदा तैं दिलबर दा थिया ग़ुलाम फ़रीदे ।

५२

वंजां मुट्ठड़ी रोही वुट्ठड़ी टोभा तार मतारां ।
डेखां वंज कर माल दे लांघे घंड घंड विच्च तवारां ।
भेडां बकरियां गाईं डेखां सहजों अंगन बहारां ।
यार फ़रीद मतां गल लावम एथे मैले वेस उतारां ।

५३

अलसत कनूं दिल मसत होइम जां सुणिअम अलसती कौले ।
'कालू बला' इकरार असाडा बा सिदक सफ़ा रूह बोले ।
अहदों अहमद बण कर आया हिक्क मीम खड़ा विच्च ओले ।
ग़ुलाम फ़रीद दी दिल चा लुट्टड़ी ओ सोहने अरबी ढोले ।

५४

मरवेसां इह दरद कूकेंदी क्युं दिलबर दिल्लड़ी चाती ।
नीर हज़ारां ठंडे साह हुन नित्त हिजर दी काती ।
तोड़े सै सै मिनतां कीतम आ पाई यार न झाती ।
यार फ़रीद आइम वेड़े हुन साडी ख़तम हयाती ।

५५

वंज वे कासद यार दी ख़िदमत साडा रो रो हाल सुणावीं ।
साडी कहीं कसूरे मान भर्या आ रोंदी कूं गल लांवीं ।
कोझा हाल असाडा तै बिन चा कदम मुबारक पांवीं ।
ग़ुलाम फ़रीद मतां मर वंजां चा दीदार डखावीं ।
५६ आ सजन मन नाम खुदा दा
खुली मौसम चेतर बहारां ।
संगियां सईआं दर गल लाए
मैं खुल्ही करां पुकारां ।
सेज फुलां दी मूल न भांदी
नित्त गांदी सोज़ दियां वारां ।
यार फ़रीद अंगन पाउं पांवीं
तां मैं भी शुकर गुज़ारां ।

५७

केची होत पुन्नल कूं घन गए हाय तेज़ रफतार उठां दी ।
थी बेदार सस्सी सड्ड मारे वंजे कूंज वांग कुरलांदी ।
डेखे पैरि पौवन घेरे तत्ती ज़ालम रेत थलां दी ।
आख फ़रीद सस्सी मोई थलां विच्च कफ़न बोछन बाह सरांदी ।

५८

आखां खली साडे लिड़े आ रांझन माल चरांई हा ।
कट्टियां तैं बिन बैठियां रहन्दियां आ आपने भांड़ वसाई हा ।
ला इला हा इल्ल लिल्ला दी
वंजली आन सुणाई हा ।
आख़ फ़रीद मुहमद रसूल अल्ला
साडी तन मन जोत जगाई हा ।

५९

रात डेहां फ़र्याद हमेशा एहा दिल्लड़ी दरद पुकारे ।
दरद फ़राक हिजर कनूं हुन हर दम सोज़ दे नाअरे ।
सेज सूलां दी नन्दर न आंदी रब्ब डेवे सुख दे वारे ।
यार ग़ुलाम फ़रीद बाझों जग डिस्सदा धूआं अंधारे ।

६०

सोहना बेला सावे टिल्लड़े इशक रांझा जागीरे ।
मंझियां कट्टियां कूं धनवाए आ नज़र तैंडी अकसीरे ।
मट्टियां दुध वलोड़ां किवें तैं बिन हीर ज़हीरे ।
आख फ़रीद दिल हिजर न सहन्दी डस्स हीर दी क्या तकसीरे ।

६१

अरब शरीफ दा मुलक अजायब जथां अरबी ढोल प्या वस्सदा ।
दिल्लड़ी अरबी यार पुकारे जिवें आवाज़ जरस दा ।
रहन्दा दिलबर मीम दे ओले लुक छुप भेत न डस्सदा ।
यार फ़रीदा अरज़ मनज़ूर करे चा ईं आजज़ बेकसदा ।

६२

सावन मद सुहाग दी सोहनी आरफ़ इबरत खादे ।
खिमन ख़िमदी बदल गज़कारां कई आंदे ते कई जांदे ।
यार जिन्हां दे कोल पए वस्सदे हार सिंगार पै ठांदे ।
यार फ़रीद आ सीने लाईए डस्स बाकी क्या चांहदे ।

६३

सुरखी कज़्ज़ला डितम मथे कपड़े मैल कचेले ।
क्या धांवा क्या ज़ेवर कपड़े क्या लाउं तेल फुलेले ।
यार बाझों हुन जीवन कूड़े मौत मारम चा पहले ।
आब हयात है रुख दिलबर दा फ़रीद करे रब्ब मेले ।

६४

इशक लेला विच्च मजनूं कामल खड़ा लेला याद करेंदा ।
बारां साल जंगल दे विच्च चंम बदन खड़ा सुकेंदा ।
सग लेला दा बाहर आया प्या मजनूं पैर चुंमेंदा ।
सादक इशक फ़रीद जिन्हां कूं जैंदीं मोईं तोड़ निभेंदा ।

६५

हुसन परसती रमज़ अजायब
हासल इशक मजाज़ी ।
दर हकीकत इशक हकीकी
दर परदे कसरत साज़ी ।
आशक सादक वासल बिला
राज़ रमूज़ दी बाज़ी ।
मज़हर नूर जमाल वसाल थिया
यार फ़रीद ते राज़ी ।

६६

लक्ख शुकराना पढ़ां दोगाना अरबी मैं घर आया बख़त सिवाया ।
सदके वैंदी कदम चुंमेंदी रब्ब दीदार डखाया बख़त सिवाया ।
डोहीं जहान कुरबान करां जै ताज लौलाकी पाया बख़त सिवाया ।
बेशक यार फ़रीद सोहना है आया नहीं वलाया बख़त सिवाया ।

६७

कोट मिट्ठन है किबला काबा ज़ाहर नूर इरफान आया ।
कुतबी गौसिया ख़ास मदारज मारफ़त दा सामान आया ।
चिशत बहशत है नूर मुहमदी अजब मज़हर ज़ीशां आया ।
ग़ुलाम फ़रीदा दिल लुटन कीते बण कर फ़खर जहां आया ।

६८

कोट शरीफ है नूर खुदाई फ़खर रौशन जमीरे कामल पीरे ।
कसम खुदा दी मुरशद हादी नज़र जैंदी अकेरे कामल पीरे ।
वाकफ़ राज रमूज़ रबानी साहब फ़ैज मेनरे कामल पीरे ।
यार फ़रीद न लहम संभाल थिया सिदकों दिलगीरे कामल पीरे ।

६९

फ़खर न करवे ऐडा बन्द्या फ़खर कीते की कंम आवनाई ।
तैंडे नाल दे सानी लड्ड सिधाए उदरे तू वी लड्ड सधावना ईं ।
कुझ मसलम नहीं बन्द्या नाल तैंडे वकत गुज़ार के पछोतावनाईं ।
पढ़ कलमा ते आख फ़रीद बन्द्या औखे सौखे वेले कंम आवनाई ।

७०

शरम रसूल करीम साईं नूं मैंडा बेड़ा टांग ते लावनाई ।
घुमर घेर गुनाह दा फेर पोवन लायला दा पक्ख चढ़ावनाई ।
चपे बण के नूर शफायत वाले इल लिल्ला दा वंज लगावनाई ।
मैडा पीर फ़रीद अरज़ करे सारी उम्मत नूं पार लंघावनाई ।

७१

मैं वल अक्खियां मूल न भालीं तैंडे नैन मरेंदे काती ।
हक डेंह भुल भुलेके लायम अते चीर सुट्यो ने छाती ।
पुच्छां हकीम जर्राह स्याने पट्टियां बद्धां डेंह राती ।
सदका पीर फ़रीद दा साईं कडां रांझन पैसी झाती ।

७२

बाग तैडे दा संगतरा होवां मै ता शाखों तरोड़ के नीवां ।
आवां हत्थ माशूकां दे मैं तां डल्लियां डल्लियां थीवां ।
चोपन चोप के स्ट्टन विच्च गलियां मैं तां पैरां हेठ मंडीवां ।
डेवन बुहारियां साड़न मैकूं तूं सेकीं ते मैं जीवां ।

७३

इशक ते बाह बरोबर, इशक दा ता तखेरा ।
बाह सड़ेंदी कक्ख काने नूं इशक सड़ेंदा जेअड़ा ।
बाहर सामे नाल पानी दे,इशक दा दारू केहड़ा ।
यार मैडे उत्थे चाह ना रक्खीं, जित्थे इशक लायन्दा डेरा ।