आ मेरै घर आ चिड़ीए,
कदे नूंह बनीऐ, कदे धी बनीऐ।
फेरा स्हाड़े पा अड़ीए
कदे नूंह बनीऐ, कदे धिय बनीऐ॥

साडे बनेरे ब’म्यां चिड़ीए,
घर विच रम्यां-झम्यां चिड़ीए
तान देयी तूं सवेआं चिड़ीए
आहलना इक्क बणाय ‘लड़ीए’।
कदे नूंह बनीऐ, कदे धिय बनीऐ॥

बड्डलै उट्ठी चूं-चूं करे आं,
रहोल मेरे बेहड़े इच भरेआं।
असेंगी दिक्खी-दिक्खी ठरेआं,
स्हाड़ै इच्च समाय लड़ीए।
कदे नूंह बनीऐ, कदे धिय बनीऐ॥

उड्डरी उड्डरी बारो-बारी,
चिड़ा-चिड़ी जां लाड़ा-लाड़ी।
सुन्नी र’वै ना देहरी स्हाड़ी,
भाखें आहले गा लड़ीए।
कदे नूंह बनीऐ, कदे धिय बनीऐ॥

अन्दरें-बाहरें पा तूं फेरा,
कदें रफ्हेरां, कदें दफ़्हेरां फेरा,
जो ऐ मेरा, ओह सब तेरा,
सब किश गलै नै ला अड़ीए।
कदे नूंह बनीऐ, कदे धिय बनीऐ॥

(ब’म्यां=बैठ जाओ, सवेआं=सोते हुए,
लड़ीए=हे सखि, बड्डलै=सुबह, रहोल=
मिलकर, भाखें आहले=लम्बी तान के
डोगरी गीत, रफ्हेरां= चक्कर,मुकलावा)

धन्न जिगरे मावें दे सहुरे भेजियां जाईआं,
इह लटबांवरियां धियां सुख भोगन साईआं।

थम्मी नै टंगी दी रेही बंगें दी जोड़ी,
सूही परांदी पड़छत्ती दे उप्पर छोड़ी।
अद्धे गुलुबन्दै इच खोभी गेयी सलाईआं,
इह लटबांवरियां......।

सुखै दी ठंडी ब्हाय आवै जे औन सुनेहड़े,
लंमे होन पसार ते खुल्ले-डुल्ले बेहड़े।
गोद भरै करतार तां कूंजां गान बेहाईआं,
इह लटबांवरियां.....।

हुकम होए हासल ते टब्बर सोह नेईं खन्दा,
घोट्टी रक्खना खीसे इच माऊ दा मन्दा।
अक्ख भरै नेईं बाबल जी दियां चिट्ठियां आईआं,
इह लटबांवरियां.....।

फुल्लें आंगर खिड़ना, कशबोयी गी बंडना,
फट्टे दा टल्लू सीना, त्रुट्टे दा गंढना।
चम्बे दी डाल्ही कशबोईआं होन सुआईआं,
इह लटबांवरियां.........।

(बेहाईआं =बढ़ाई, सोह =सूचना,
मंदा =उदासी, टल्लू=कपड़ा)

मेरे सुखने च बगेआ चन्हांअ
ते अक्खियां भरी आईआं।
सुत्तनींदरे को आली गेयी ऐ मां
ते अक्खियां भरी आईआं॥

कंढै कंढै किरी पे न कींगरे चन्हांय दे,
हद्दां सब टप्पी गे बोआल मनां दे,
बगी-बगी गेआ हुट्टीए समां,
ते अक्खियां भरी..................

ढेई पेदे डंगे मेरे सुखने च चड़्ही गे,
तापै दे चनार पज्ज उतरीऐ अड़ी गे,
टप्प-टप्प करी बगेआ तमां,
ते अक्खियां भरी.....................

छेडै च चन्हांय दी, रुड़्ही गे न बोल बी,
जेक्का मता दूर हा, ओह आई बैठा कोल बी,
उस्सी दिक्खी-दिक्खी उडरै रोआंह
ते अक्खियां भरी....................

कैईं दे कटोरे इच्च
डलका दा छल्ल हा,
सामने खडोत्ता मेरा राह्ना नेहा कल्ल हा,
अक्खीं मीटी-मीटी परती सवां,
ते अक्खियां भरी...................

(चन्हांअ=झनांअ, बोआल=उबाल,
मता=बड़ा, कैईं=कांसा)

बाबल मिगी सद्दी भेज्यो जी।
बाबल मेरी मुघ्घनी रेही गेई जी,
मुघ्घनी इच्च रक्खड़ी दे पैसे,
मुघ्घनी इच्च टिक्के दे पैसे,
मुघ्घनी इच्च केयी साईआं,
बाबल मिग्गी.....॥

बाबल मेरी गुड्डी रेही गेई जी,
गुड्डी मेरी माऊ बनाई,
भाबी ने चित्तरी-बनकाई,
गुड्डी करै घमाईआं,
बाबल मिग्गी......॥

बाबल मेरे बच्छू रेही गेई जी,
सुनैआ गौ-ग्रास नेईं खन्दा,
डिओड़्ही दिक्खी रम्हांदा रौंहदा,
रस्सियां केई तड़ाईआं,
बाबल मिग्गी........॥

(सद्दी भेज्यो=बुला लो, मुघ्घनी=
बुघनी, साईआं=साई लाई, अग्रिम
राशी दी, बच्छू=बछड़ा)

अज्ज लाम जित्ती घर आया,
शपाई मेरा डोगरा।

हत्थ बन्दूक, गले इच गान्नी,
बांकी टोर ढोल मसतानी,
नैन कटोरे, रंग शमानी,
चन्न दिक्खियै शरमाया,
शपाई मेरा डोगरा।

जि’नैं बैरकें रौहन शपाई,
उंदे उप्परा अ’ऊ घमाई,
छुट्टीयां औंदे ब’र्हे छमाही,
मन्दा डाहडा लाया,
शपाई मेरा डोगरा।

आई बसाखी, कनकां पक्कीयां,
दिक्खी-दिक्खी हुट्टियां अक्खीयां,
सोची-सोची रेही गेईयां सखीयां,
काट कोई नहीं आया,
शपाई मेरा डोगरा।

कंजकां सुक्खीयां, छिल्लू चाड़्हे,
कदूं घर औन शपाई साड़्हे,
कलमां भन्नीयां, कागज़ फाड़े,
थौह लिखने दा नेईं आया,
शपाई मेरा डोगरा।
(छिल्लू=लेले,भेड़ के बच्चे)

सं’झ रौंगली ते घट्ट ए दुआस मती ऐ

पानी तविआ च घट्ट ए पयास मती ऐ

लालगी शमान दी ए खून बेजबान दा,
गास्सै दे पोआर कोई छाननी ए छानदा
जानदा नीं कोई इत्थें बुझदा नीं कोई,
गास्सा चाननी ते घट्ट ए भड़ास मती ऐ
सं’झ रौंगली ते घट्ट ए.....॥

मन्दरै दे बन्द भित्त खोल्हदा पजारी ऐ,
ठौगरें दी चौक्कीयै र न्हेर ऐ गबारी ऐ,
धौफ-बत्ती बालदी कुसारी इक कंजक,
लोअ उज्जली ते घट्ट ए नरास मती ऐ।
सं’झ रौंगली ते घट्ट ए........॥

ठंडी-ठीरी नारै आ्हगूं जंमूए दी रात ओ,
चम्बे ते चमेलीयै च नित्त-नमीं बात ओ,
चन्न अज पीला ऐ दुआस इहदी चाननी,
पीड़ कालजै च घट्ट ऐ खराश मती ऐ।
सं’झ रौंगली ते घट्ट ए........॥

(रौंगली=रंगीली, दुआस=उदास, मति=बहुत,
तविआ=तवी दरिया, शमान =आसमान,
गास्सै दे पोआर=आकाश के पार, भड़ास =उमस,
भित्त=दर, ठौगरें =ठाकुर, कुसारी =कुँआरी)

ठंडू दे दिन आए,
चिट्ठियां भेजेआं माए।

कान्नी गी हिरदे चा फाड़ी,
स्याही गी दुद्धै इच काड़्ही,
अक्खर होन सोआए,
ठंडू दे दिन आए।

माए अ’ऊं आं धीअ कमेरी
आंदर होई जा निघ्घी मेरी
रोआं नेईं रोआए,
कोई रुआए तां नहीं रोंदी
ठंडू दे दिन आए।

काकल चौर्हा करेआं इ’यां,
बय्हानू जौड़े जक्के जि’यां,
मिट्ठे लग्गन पराए,
ठंडू दे दिन आए।

बीर ल्हौकड़ा जदूं बी बहोए
मिग्गी नींदरा पैहलें थहोए,
कि ‘यां न मां जाए,
ठंडू दे दिन आए।

(कान्नी गी=कलम ने, रोआं नेईं=
नहीं रोती, बय्हानू=विवाह के,
बीर ल्हौकड़ा जदूं बी बहोए=छोटे
भाई का विवाह, मिग्गी नींदरा पैहलें
थहोए=मुझे न्यौता पहले भेजना,
कि ‘यां न मां जाए=माँ के
जाए जो हुए, काकल=कागज़)

मिट्ठड़ी ऐ डोगरे दी बोल्ली,
ते खंड मिट्ठे लोक डोगरे।

गल्ल नेईओं सहारदे,
ते बोल नेईओं हारदे,
दिन्दे ने जबान तोल्ली-तोल्ली,
ते खंड मिट्ठे लोक डोगरे।

देवतें-दोआलें गी मक्खनै ने पालदे,
शिवें दे दवार जल मनै-बद्धा ढालदै,
देवीएं न चाड़्हदे न छिल्ली,
ते खंड मिट्ठे लोक डोगरे।

चांदीए दा तोड़ा ते सुन्नै दा बलाकड़ू,
मंडीयै दा मियां मोआ मूंढै दा गै आकड़ू,
दिक्खै दा बन्दूक खोहली-खोहली,
ते खंड मिट्ठे लोक डोगरे।

जोद्धे ते सूरमे विदवान कलाकार न,
जम्मूए दे गले इच फुल्लें दे इह हार न,
चित्तरी दी दिक्खी लै बसोहली,
ते खंड मिट्ठे लोक डोगरे।

(बलाकड़ू=छोटी नत्थ, मूंढै दा गै
आकड़ू=शुरू से ही अकड़ा,
चित्तरी=खास कढाई)

बद्दलें दे भित्त खुल्ली गे,
अ’ऊं चल्लीयां डुब्बनै गी।
खेतरें च बीअ पेई गी,
अ’ऊं चल्लीयां उग्गनै गी।

बाजीयां बिछीयां न तां
मालीयां जतोनीयां,
दंगलै दे रंग बझ्झी पे,
पेईयां न फलौहनीयां,
कोई अवै जां नेईं अवै,
अ’ऊं चल्लीयां पुग्गनै गी।
बद्दलै दे भित्त.................॥

पिप्पलें चा लंघी गेई ए ब्हा,
कम्बी पेईआं टाहलयां,
बिजली दे उड्डी गे रुआंह,
उडी गेईयां लालीयां,
पीली-पीली स’रेआ खिड़ी
अ’ऊं चल्लीयां चुग्गनै गी।
बद्दलै नें भित्त.........॥

देवका च हाड़ आई गे,
डबरां बन्दोतीयां
बौल्लीयां भरोचीयां
जि’यां अक्खीयां भरोचियां,
खोभे आहले थाहर दस्सेओ
अ’ऊं चल्लीयां खुब्बनै गी।
बद्दलां दे भित्त.......॥

भरी आया बद्दलैं दा मन,
बगी पे न अत्थरूं,
खुल्ली गेआ धरतीया दा मूंह,
फटेआ बदल जदूं,
सुक्केदा हा मेरा लूं-लूं
अ’ऊं चल्लीयां सिज्जनै गी।
बद्दलां दे भित्त.......॥

(मालीयां जतोनीयां=जीत जीतना,
फलौहनीयां=पहेलियां, रुआंह=होश,
देवका=नदी, डबरां=छप्पड़,
भरोचियां=भर गईं)

अस डोगरे आं आखने आं शानै कन्नै।
अस डोगरे आं आखने आं शानै कन्नै।
असें जित्तीयां न जंगां घमसानै कन्नै।

निक्के निक्के घर साड़्हे, निक्की निक्की मरजी,
निक्कीयां न लोड़ां अस मती दे नीं गरजी
यस परौहने न रक्खने आं मानै कन्ने।
अस जित्तीयां......................॥

डोगरे आं साड़्हे कन्ने डोगरी च बोल्लेओ,
मिट्ठड़ी जबान साड़्ही मोतीयें ने तोल्लेओ,
अस अक्खरें गी तोल्लने आं पान्नै कन्ने।
अस जित्तीयां......................॥

उज्जड़ै दे लोक असें घरै च बसाए न,
रुट्टी बंडी खादी असें गलै कन्ने लाए न
सच्चें साड़्ही नीं बनतर स्हानै कन्ने।
अस जित्तीयां......................॥

वैशनो ए माता साड़्ही पहाड़ें बिच्च रौंहदी ऐ,
कंजक पजोने तांईं खल्ल ढली औंदी ऐ
सच्चे गोपीयां बी सोभदीयां काहने कन्ने।
असें जित्तीयां न जंगां घमसानै कन्नै।

(अनुवाद=श्रीमती कांता डोगरा की सहायता से)

(अदारा 'प्रीत लड़ी' से धन्यवाद सहित)