असीं निमाणे सावे पत्तर,
सानूं कौण ख़्याले ।
दो दिन छां फुल्लां दी सुत्ते,
जागे साडे ताले ।
सोहणे दे गुलदसते ख़ातर,
जाण जदों उह लग्गे,
खा के तरस असां उते वी,
लै गए सानूं नाले ।

रब्ब इक्क गुंझलदार बुझारत
रब्ब इक गोरख-धन्दा ।
खोल्हण लगिआं पेच एस दे
काफ़र हो जाए बन्दा ।
काफ़र होणो डर के जीवें
खोजों मूल ना खुंझी
लाईलग्ग मोमन दे कोलों
खोजी काफ़र चंगा ।

तेरी खोज विच अकल दे खंभ झड़ गए
तेरी भाल विच थोथा ख़्याल होया ।
लक्खां उंगलां गुंझलां खोल्ह थक्कीआं,
तेरी ज़ुलफ़ दा सिद्धा ना वाल होया ।
घिग्गी बझ्झ गई संखां दी रो-रो के,
पिट्ट-पिट्ट के चूर घड़्याल होया ।
चीक-चीक के कलम दी जीभ पाटी,
अजे हल्ल ना तेरा सवाल होया ।
तेरी सिक कोई सज्जरी सिक तां नहीं,
इह चरोकणी गले दा हार होई ।
इह उदोकणी जदों दा बुत्त बणिआ,
नाल दिल दी मिट्टी त्यार होई ।1।

तेरे हिजर विच किसे ने कन्न पाड़े
अते किसे ने जटां वधाईआं ने ।
बूहे मार के किसे ने चिले कट्टे,
किसे रड़े 'ते रातां लंघाईआं ने ।
कोई लमकिआ खूह दे विच पुट्ठा,
अते किसे ने धूणिआं ताईआं ने ।
तेरे आशकां ने लक्खां जतन कीते,
पर तूं मूंह तों ज़ुलफ़ां ना चाईआं ने ।
तेरी सिक्क दे कई तेहाए मर गए,
अजे तीक ना वसल दा जुग लभ्भा ।
लक्खां सस्सिआं मर गईआं थलां अन्दर,
तेरी डाची दा अजे ना खुरा लभ्भा ।2।

किसे फुल्ल-कुरान दा पाठ कीता,
किसे दिल दा पत्तरा खोल्हआ वे ।
किसे नैणां दे सागर हंगाल मारे,
किसे हिक्क दा खूंजा फरोलिआ वे ।
किसे गल्ल्हां दे दीवे दी लोअ थल्ले,
तैनूं ज़ुलफ़ां दी रात विच टोलिआ वे ।
रो रो के दुनिआं ने राह पाए,
पर तूं हस्स के अजे ना बोलिआ वे ।
दीदे कुलंज मारे तेरे आशिकां ने,
अजे अत्थरू तैनूं ना पोहे कोई ।
तेरी सौंह, कुझ रोण दा मज़ा ही नहीं,
पूंझण वाला जे कोल ना होए कोई ।3।

तेरी मांग दी सड़क ते पिआ जेहड़ा,
उस नूं हील्आं नाल परताइआ तूं ।
हरसां, दौलतां, हुसनां, हकूमतां दा,
उहदे राह विच चोगा खिंडाइआ तूं ।
किसे कैस नूं लग्गा जे इशक तेरा,
उस नूं लेली दा लेला बणाइआ तूं ।
किसे रांझे नूं चढ़आ जे चा तेरा,
उस नूं हीर दी सेजे सवाइआ तूं ।
साडे हंझूआं कीता ना नरम तैनूं,
साडी आह ने कीता ना छेक तैनूं ।
असीं सड़ गए विछोड़े दी अग्ग अन्दर,
लागे वसद्आं आया ना सेक तैनूं ।4।

किसे छन्ना बणाइआ जे खोपरी दा,
तूं बुल्ल्हिआं नाल छुहाईआं ना ।
किसे दिल दा रांगला पलंघ डाहआ,
तेरे नाज़ नूं नींदरां आईआं ना ।
किसे जुत्तिआं सीतिआं चंम दिआं,
तेरी बे-परवाही ने पाईआं ना ।
रगड़-रगड़ के मत्थे चटाक पै गए,
अजे रहमतां तेरिआं छाईआं ना ।
मार सुट्ट्या तेरिआं रोस्आं ने,
फूक सुट्ट्या बे-परवाही तेरी ।
लै के जान तूं अजे ना घुंड चाइआ,
ख़बरे होर की ए मूंह विखाई तेरी ।5।

जे तूं मूंह तों ज़ुलफ़ां हटा देवें,
बिट बिट तक्कदा कुल संसार रह जाए ।
रह जाए भाई दे हत्थ विच संख फड़्या,
बांग मुल्लां दे संघ विचकार रह जाए ।
पंडत हुरां दा रह जाए संधूर घुलिआ,
जाम सूफ़ी दा होया त्यार रह जाए ।
कलम ढह पए हत्थों फ़िलासफ़र दी,
मुनकिर तक्कदा तेरी नुहार रह जाए ।
इक घड़ी जे खुल्हा दीदार दे दएं,
साडा नित्त दा रेड़का चुक्क जावे ।
तेरी ज़ुलफ़ दा सांझा पिआर होवे,
झगड़ा मन्दर मसीत दा मुक्क जावे ।6।

अज्ज मैं तक्किआ अक्खां नाल,
विच गोदड़ी लुकिआ लाल ।
सिर दे उते फटा परोला,
ठिब्बी जुत्ती गंढ्या झोला ।
छिज्जे कपड़े होए लंगारे,
विचों पिंडा लिशकां मारे ।
हुसन ना जावे रक्ख्या ताड़,
निकल आउंदा कपड़े पाड़ !

नहीं इह अंगर, नहीं लंगारे
इह तां फट्ट नसीबां मारे ।
या फिर लुट्टण मारन डाके,
वड़ी ग़रीबी सन्न्हां ला के ।
हुसन ओस दा मैं की आखां,
तक्कन नाल पैंदिआं लासां ।
धौण गोरी दी ऐसी फब्बे,
आउंदा जांदा साह पिआ लभ्भे ।
गोरा गल, गुलिआं दी गानी,
इक थां वसदे अग्ग ते पाणी ।
नैण गोरी दे बातां पावण,
मसती दे सागर छलकावण,
या इह बन्द ओस ने कीते,
कुज्ज्आं विच दरिआ हुसन दे ।
वाल, दुपहरे रातां पईआं,
तक्क तक्क कुत्ते लैंदे झईआं ।
मोहन, खिझ ना इहनां उते,
सदा रात नूं भौंकन कुत्ते ।

वाह ग़रीबी वारे तेरे !
वसदे रहन चुबारे तेरे !

(गुलेली या गुलेलिआणिआं उह हन जो सूईआं, कंधूईआं,
चरखे दिआं चरमखां वेचदिआं हन ।)

अपनी ज़ात विखालन बदले
रब्ब ने हुसन बणाइआ ।
वेख हुसन दे तिक्खे जलवे,
ज़ोर इशक ने पाइआ ।
फुरिआ जदों इशक दा जादू,
दिल विच कुद्दी मसती ।
इह मसती जद बोल उठी,
तां हढ़ कविता दा आया ।

जून बन्दे दी चंगी होसी,
ऐपर मैं पछतांदा ।
चंगा हुन्दा जे रब्ब मैनूं,
जंगली फुल्ल बणांदा ।
दूर दुरेडे पापां कोलों
किसे जूह दे खूंजे,
चुप चुपीता उगदा, फुलदा,
हसदा ते मर जांदा ।

इह गाधी बणी नवारी,
अग्गे वगदा बलद हज़ारी
कर इस उत्ते असवारी,
भुल्ल जावन दोवें जग्ग नी,
साडे खूह 'ते वस्सदा रब्ब नी ।

इत्थे घम्म घम्म वगन हवावां,
अते घुमरिआं घुमरिआं छावां,
नी मैं अग्ग सुरगां नूं लावां,
जद पए इथाईं लभ्भ नी ।
साडे खूह 'ते वस्सदा रब्ब नी ।

मैं थां थां टुभ्भी लाई,
ना मैल किसे वी लाही,
शाबा अउलू दे आई,
जिस मैल वंजाई सभ नी,
साडे खूह 'ते वस्सदा रब्ब नी ।

सुन ठक ठक, रीं, रीं, वां वां,
मैं उड्ड उड्ड उथे जावां,
जिथे अपड़े टावां टावां,
ते बिरती जावे लग्ग नी,
साडे खूह 'ते वस्सदा रब्ब नी ।

जद मोड़े देहुं मुहारां
कुड़िआं चिड़िआं, मुट्यारां,
बन्न्ह बन्न्ह के आवन डारां,
ज्युं कर मूणां दे वग नी,
साडे खूह 'ते वस्सदा रब्ब नी ।

उह टोकां करदिआं आवण,
कदी गुटकन ते कदी गावण,
पए नक्क विच लौंग सुहावण,
ते झिलमिल करदे नग नी,
साडे खूह 'ते वस्सदा रब्ब नी ।

थल्ले एनूं जड़े सतारे,
उत्ते तिन्न तिन्न घड़े उसारे,
पिआ लक्क खावे लचकारे,
उह फिर वी लान ना पब्ब नी,
साडे खूह 'ते वस्सदा रब्ब नी ।

देहुं-लत्थे खोल्हां ढग्गे,
चढ़ पैन सतारे बग्गे,
ना हिंग फ़टकड़ी लग्गे,
ख़ुद दीवे पैंदे जग नी,
साडे खूह 'ते वस्सदा रब्ब नी ।

मैं पद्धरे मंजा डाहवां,
कर निस्सलिआं पै जावां,
झुल पैण पुरे दिआं 'वावां,
ते अक्ख जाए फिर लग्ग नी,
साडे खूह 'ते वस्सदा रब्ब नी ।

उह किद्धर गए दिहाड़े ?
जद छत्तो दे पिछवाड़े,
सां बेर छत्तो दे ढांहदे,
हस्स-हस्स के गाल्हां खांदे ।

कर लागे-लागे सिरिआं,
उह बेरी थल्ले बहना ।
थोढ़ी जेही घुर-घुर मगरों,
फिर जा छत्तो नूं कहना :
'छेती कर बेबे छत्तो !
तैनूं सद्ददी भूआ सत्तो ।'
उस जाणा हौली हौली,
असां कर के फुरती छुहली,
गाल्हड़ वांगूं चढ़ जाणा,
बेरां दा मींह वर्हाना ।
आपीं तां चुण-चुन खाणे,
छुहरां नूं दब्बके लाने :
बच्चू हरनाम्आं खा लै !
संतू डब्बां विच पा लै !
खा खू के थल्ले लहणा,
फिर बण वरतावे बहणा,
कुझ वंड कराई लैणी,
कुझ कंडे-चुभाई लैनी ।
फिर चीक चेहाड़ा पाणा,
उत्तों छत्तो आ जाणा ।
उस झूठी मूठी कुटणा,
असीं झूठी मूठी रोणा ।
उस धौन असाडी छड्डणी,
असां टप्प के पर्हे खलोना ।
उस गाल्हां देणिआं खल्ल्ह के,
असां गाउना अग्गों रल के :
छत्तो माई दिआं गाल्हां,
हन दुद्ध ते घ्यो दिआं नालां ।

अज्ज ओए जे कोई आखे,
असीं होईए लोहे लाखे ।
अज्ज सानूं कोई जे घूरे,
असीं चुक चुक पईए हूरे ।
गाल्हां रहिआं इक पासे,
असीं झल ना सकीए हासे ।
गल्ल गल्ल 'ते भज्जीए थाणे,
असीं भुल्ल बैठे 'उह जाणे ।'
उह किद्धर गए दिहाड़े ?
जद छत्तो दे पिछवाड़े,
सां बेर छत्तो दे ढांहदे,
हस्स-हस्स के गाल्हां खांदे ।

मां वरगा घण छावां बूटा,
मैनूं नज़र ना आए ।
लै के जिस तों छां उधारी,
रब्ब ने सुरग बणाए ।
बाकी कुल दुनिआं दे बूटे,
जढ़ सुक्आं मुरझांदे,
ऐपर फुल्लां दे मुरझाइआं,
इह बूटा सुक जाए ।

मां समझावे मुड़ जा हीरे,
कलां जगा ना सुत्तिआं ।
नहीं तां पुट्ठी खल्ल लुहा के,
तेरा मास खलावां कुत्तिआं ।
नाल ख़ुशी दे हस्स के अग्गों,
हीर केहा सुन माए-
खलड़ी लाहसें तां की होसी ?
मेरा चाक सवासी जुत्तिआं ।

छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

देख लिआ नी तेरा गिरां,
परख लिआ नी तेरा गिरां,
जित्थे वीर वीरां नूं खांदे,
सिरों मार धुप्पे सुट्ट जांदे,
जित्थे लक्ख मण्आं दा लोहआ,
ज़ंजीरां हत्थकड़िआं होया,
जित्थे कैद-खान्आं जेहलां
मीलां तीक वलगणां वलिआं,
जित्थे मज़हब दे नां थल्ले,
दरिआ कई ख़ून दे चल्ले,
जित्थे वतन-परसती ताईं,
जुरम समझदी धक्के शाही,
जित्थे शायर बोल ना सकण,
दिल दिआं घुंडिआं खोल्ह ना सकण,
मैं नहीं रहना ऐसी थां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

की ना डिट्ठा तेरे गिरां ?
की ना सुणिआ तेरे गिरां ?
सभ कुझ डिट्ठा तेरे गिरां,
सभ कुझ सुणिआ तेरे गिरां-
डंगरां वांगूं बन्दे रब्ब दे,
बघ्घिआं अग्गे देखे वग्गदे ।
खोपरिआं दे थढ़े चिणींदे,
उते लोक नमाज़ पढ़ींदे,
लक्खां नफ़र जागदे जींदे,
बादशाहां दे संग दफ़नींदे,
'ईसा' वरगे सूली चढ़दे,
'हसन हुसैन' पिआसे मरदे,
'नानक' वरगे चक्कीआं पींहदे
'राम' जेहे बनवासी थींदे,
होर ना हुन मैं देख सकां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

बह ना ऐवें बण बण वहुटी,
तूं तां कुड़ीए नहुं नहुं खोटी ।
तेरिआं 'लूणां' वरगिआं अक्खां,
'पूरन भगत' दिलां दे लक्खां,
ठोडी दे खूह अन्दर पाए,
नाल तसीहआं दे तड़फ़ाए ।
ला ना वाधू लप्पे लारे,
फन्द तेरे मैं जाणा सारे ।
लै फड़ आपनी शुहरत फानी,
दे मैनूं मेरी गुंमनामी ।
लै फड़ आपने महल चुबारे,
दे दे मेरे छन्नां ढारे ।
लै लै आपनी नड़ी नवाबी,
दे दे मैनूं मेरी आज़ादी ।
लै लै आपनी घ्यु दी चूरी,
दे दे मैनूं मिरी सबूरी ।
लै लै आपनी कुड़े अमीरी,
दे दे मैनूं मिरी फ़कीरी ।
तेरी निक्की चीची उते,
नाच हज़ारां नी मैं नच्चे ।
होर ना हुन मैं नच्च सकां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

हुन ते नी मैं ईहो चाहां
इस शुहरत दी दन्दी उतों
मार द्आं मैं छाल हिठां
गुंमनामी दी वादी अन्दर,
थल्ले ही थल्ले रुढ़दा जां
होर हिठां…होर अगांह…होर पर्हां…
मुक्क जावन जित्थे पग डंडिआं,
रहन ना मुलकां दिआं वंडिआं,
दिसन ना जित्थे हद्दां पाड़े,
मेर तेर ते खाखोवाड़े
पहुंच ना सकन जित्थे चांघां,
बांग टल्लां ते संखां दिआं
चारे तरफ आज़ादी होवे,
मूल ना कोई मुथाजी होवे,
जो दिल आवे पंछी गावण,
चुंमन तितलिआं जो फुल चाहवण,
चाहन जिधर मुसकावन कलिआं
चाहन जिधर मुड़ जावन नदिआं,
चाहन जिधर उग आवन चीलां
चाहन जिधर चढ़ जावन वेलां,
इस आज़ाद फिज़ा दे अन्दर
मैं इक्क दुनिआं नवीं वसां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

रात दुपहरे संझ सवेरे,
महकन फुल्ल चुगिरदे मेरे,
भोले भोले, पिआरे पिआरे,
न्याने न्याणे, कुआरे कुआरे,
पिआर करां ते तां वी हस्सण,
वैर करां ते तां वी हस्सण,
तोड़ लवां ते तां वी हस्सण,
दुनिआं वांग ना रोवण रुस्सण ।
बिनां ख़ौफ़ दे पंछी सारे,
लैन झांटिआं मेरे कन्न्हाड़े,
पिंडे उत्ते हत्थ फिरवा के,
खेडन मेरे नाल बघेले,
दौड़ दौड़ हरनोटे आवण,
चुक्क चुक्क बूथी नैण चुंमावण,
भौर तितलिआं कोइलां घुग्गिआं,
हक्क मेरी ते पावन झुग्गिआं,
फड़ फड़ मेरे वाल नदान,
मसत बुलबुलां पींघां पाण,
नाले झूटन नाले गान ।
या मैं होवां या इह होवण,
या फिर होवे रब्ब दा नां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

एदां ही गुंमनामी अन्दर,
चुप्प चपीता मैं मर जां ।
ना कोई मैनूं लम्बू लावे,
ना कोई मेरी कबर बणावे,
ना कोई उत्ते फुल्ल चढ़ावे,
ना कोई उत्ते दिया जगावे,
ना कोई होवे रोवन वाला,
वैन ग़मां दे छोहन वाला,
ना ही मेरी फूहड़ी उत्ते,
जाण दुहराए मेरे किस्से,
ना ही मेरी जायदाद 'ते,
लिशकन छविआं, खड़कन सोटे,
चुप्प चुपीता मैं मर जां,
कोई ना जाणे मेरा नां,
मेरा थां, मेरा निशां-
छड्ड दे, चूड़े वाली कुड़ीए !
छड्ड दे, सोने-लद्दीए परीए !
छड्ड दे, छड्ड दे मेरी बांह,
मैं नहीं रहना तेरे गिरां ।

वेख बसंत ख़ाब अन्दर मैं
दस्सी पीड़ हिजर दी ।
हंझूआं दे दरिआ फुट्ट निकले
देख चिरोका दरदी ।
पूंझ अत्थरू मेरे बोली-
"जो रब्ब करदा चंगी,
मोहन ! किंज बणदा तूं शायर
जे कर मैं ना मरदी ।

हुसन भरी बसंत दी छैल नढ्ढी,
सीगी सिख़र जुआनी 'ते आई होई ।
किते हिक्क सी धड़कदी बुलबुलां दी,
किते भौर दी अक्ख सधराई होई ।
किते सर्हों ने सोना खिलारिआ सी,
किते त्रेल ने चांदी लुटाई होई ।
सी बसंत रानी या इह हीर जट्टी,
नवीं झंग स्यालां तों आई होई ।
एस सोहणी बसंत दी रुत्त अन्दर,
ऐवें किसे दी फ़ोटो मैं छेड़ बैठा ।
बहे ग़मां तों पल्ला छुडान लग्आं
उलटा सज्जरे ग़म सहेड़ बैठा ।1।

फ़ोटो छेड़ी ते छिड़ पिआ दिल नाले,
चढ़ी ग़मां दी पींघ हुलारे उते
आ के किसे सलेटी दी याद बह गई,
मेरे दिल दे तख़त हज़ारे उते ।
अक्खां मेरिआं विचों झना फुट्ट पई,
किसे 'सोहणी' दे इको इशारे उते ।
एस अकल दा कच्चड़ा घड़ा लै के,
औखा लग्गना अज्ज किनारे उते ।
जोशां अते उदरेव्आं अत्त चाई,
लग्गी किसे दी याद सतान मैनूं ।
खल्आं खल्आं फ़ोटो दे मूंह अग्गे,
सुफ़ना जेहा इक लग्ग पिआ आण मैनूं ।2।

की हां वेखदा ! इक पहाड़ उच्चा,
खढ़ा इक दरिआ दे तल्ल उते ।
कुच्छड़ ओस पहाड़ दे इक झुग्गी,
बैठी हूर इक्क शेर दी खल्ल उते ।
काली रात अन्दर गोरा मूंह उहदा,
जिवें बग्ग होवे कोई डल्ल उते ।
या इह राधा-विछोड़े दे विच हंझू,
फुट्ट निकलिआ शाम दी गल्ल्ह उते ।
हत्थां उहद्आं अन्दर सतार पकड़ी,
मट्ठिआं मट्ठिआं तारां हिला रही ए ।
आपनी ज़ुलफ़ जेडी लंमी हेक अन्दर
इक गीत विछोड़े दा गा रही ए ।3।

"तेरे परख लए कौल इकरार माहिया,
नाले तक्किआ तेरा पिआर, चन्ना !
बुलबुल वांग उडारिआं मारिआं नी,
मेरा उजड़्या देख गुलज़ार, चन्ना !
वे तूं नवीं डोली वेहड़े आण वाड़ी,
मेरे ठंढे ना होए अंग्यार, चन्ना !
मेरे राह वी अजे ना होए मैले,
तैनूं कुद्द्या सज्जरा पिआर, चन्ना !
पर तूं वक्खरी कोई ना गल्ल कीती;
तेरे 'कल्ले दा नहींगा कसूर, माहिया !
फुल्ल फुल्ल ते भौरिआं वांग फिरना,
इहनां मरदां दा रेहा दसतूर, माहिया ।4।

"शाम फस्स के कुबजां दे प्रेम अन्दर,
दित्ता राधकां ताईं विसार, चन्ना !
जहांगीर नूं भुल्ली अनारकली,
जदों 'मेहरां' ने कीता शिकार चन्ना !
ख़ुसरो भुल्ल के शीरीं दी शकल मिट्ठी,
'शकर लब' 'ते होया निसार, चन्ना !
सस्सी सुत्तड़ी नूं धोखा दे पुन्नूं,
ग्या होतां दे नाल सिधार, चन्ना !
मेरा इशक अमान सी कोल तेरे,
तूं वी वंञ दित्ता किसे होर ताईं ।
रब्ब सारे गुनाहिआं नूं बख़श देंदा,
पर ना बख़शदा इशक दे चोर ताईं ।5।

"तैनूं सज्जरे पिआर दी सौंह, माहिया !
कदे आया ई मेरा ख़्याल कि नहीं ?
इन्हां नैणां दे खारे समुन्दरां विच
कदी उठे नी डूंघे उबाल कि नहीं ?
कदी बैठ के किसे इकल्ल अन्दर
हौला होया एं हंझूआं नाल कि नहीं ?
कदी लाइआ ई अक्खां दे नाल चा के
मेरे हत्थां दा उणिआ रुमाल कि नहीं ?
पर तूं कासनूं दुखां दे मूंह आउंदा ?
क्युं तूं सप्पां दे मूंह 'ते पिआर देंदा ?
'सारे मूंह मुलाहज़े ने जींद्आं दे,
मोआं होआं नूं हर कोई विसार देंदा' ।6।

"हस्से असां दे जंगलां विच फिरना;
हस्से तुसां दे उच्ची अटारी, चन्ना !
साडे हिस्से पहाड़ां दे तेज़ खिंघर;
हस्से तुसां दे पलंघ नवारी,चन्ना !
हस्से असां दे पोटली कंड्आं दी,
हस्से तुसां दे फुल्लां दी खारी, चन्ना !
गल असां दे कम्बली जोगणां दी;
गल तुसां दे बांह पिआरी,चन्ना !
हुन तां अक्खिआं दे उत्तों खोल्ह पट्टी,
घत्त लून ना अल्ल्आं फट्टां उत्ते ।
तेरा 'दिल-मिरज़ा' कदों तीक सौंसी,
'भुल्ल-साहबां' दे सुहल पट्टां उत्ते ।7।

" उह वी समां सी पलक ना झल्लदा सैं
वे तूं मेरिआं अक्खां वटाईआं नूं ।
हस्स-हस्स के वढ्ढिआं तारदा सैं
मेरे नैणां दे शोख सिपाहिआं नूं ।
तक्क तक्क के मूल ना रज्जदा सैं
वे तूं मेरिआं कोमल कलाईआं नूं आ के नव्आं ख़ुमारां दे लोर अन्दर
अज्ज भुल्ल बैठैं अक्खां लाईआं नूं ।
लोहा आखां कि तैनूं तराड़ आखां,
वे मैं की आखां, मेरे कंत, तैनूं ?
हुन तां छेवीं बसंत वी लंघ गई ए,
चेते आई ना आपनी 'बसंत' तैनूं ?"।8।

उस दे मूंहों बसंत दा नां सुन के,
झड़ी झल्ल्आं नैणां ने ला दित्ती ।
रोंदा देख उस हूर ने सोहल वीणी
मेरी धौन दे गिरदे वला दित्ती ।
मैं वी कम्बदी कम्बदी बांह आपणी
योस सोहणी दे गल विच पा दित्ती ।
गले मिलद्आं ही मूधा जा पिआ मैं,
मेरी सद्धरां होश भुला दित्ती ।
जदों होश आई की हां वेखदा मैं,
नवीं नार सिर्हाने 'ते खढ़ी होई ए ।
डिग्गा पिआ वां फ़रश ते मूंह परने,
हत्थीं फ़ोटो बसंत दी फड़ी होई ए ।9।

(कवी)

तक तक तैनूं भैन मेरीए, नैण हराने मेरे ।
तूं तां परी हुसन दी जापें कित्थे शाह पर तेरे ?
क्युं तूं लाह संगचूरां ताईं, चन्दन कीता ख़ाली ?
इक्को वारी सारी सुम्बल पुट्ट ना सुटदे माली ?
भन्न सुट्टदा मैं हत्थ ओस दे हत्थ जे पैंदा मेरा,
जिस ज़ालम ते पापी बन्दे, सरू छांग्या तेरा ।
वेलां बाझ ना सोहण सुफैदे, जालां बाझ शिकारी,
सप्पां बाझ ना सोहण ख़ज़ाने, मुशकां बाझ ततारी ।

(सिंधण)

आ जीवें ! मैं दस्सां तैनूं, क्युं मैं वाल मुनाए ।
दरद हिजर द्आं कुठ्आं ताईं, लंमी रात ना भाए ।
की पुच्छना एं ? किधर टुर गए, वाल कुंडलां वाले;
दिल मेरे दा डाकू नस्स्या, लै हथकड़िआं नाले ।
वाल उडणे, ढाई घड़ीए, वाल कौडिआं वाले,
योस सपेरे माही बाझों, कौण इन्हां नूं पाले !
जे ना वाल मुनांदी, नित नित डुल्ल्हदे नैण विचारे,
हो नहीं सकदा, रातां होवन, नाल ना डल्हकन तारे ।
जा बैठा उह आप सवरगीं मैनूं छड्ड के कल्ली,
ना उस घल्लिआ सुख-सुनेहड़ा, ना उस चिट्ठी घल्ली ।
तूं समझें मैं कमली-रमली, सिर दे वाल मुनावां
उस माही नूं घल्लन सुनेहड़ा, मैं पर काग उडावां ।
बह बह काग बनेरे उस दे, चोखा चिर कुरलावण
ओड़क हो बे आस विचारे, फिर पिछांह मुड़ आवण,
फेर उडावां, फिर उह मोड़े, फिर घल्लां, परतावे,
एसे तर्हां उडांदी जासां, बन्न्ह के लंमे दाहवे ।
कागां हत्थ ना एदां जे कर होया कोई नबेड़ा ।
फिर घल्लसां मैं 'नल' आपने नूं हंसां हत्थ सुनेहड़ा ।
हंस मेरे वी कागां वांगर, जे बदकिसमत जापे,
चढ़ तख़ते दे उडण-खटोले फिर मैं मिलसां आपे ।

(इह ख़्याल इक सिंधन कुड़ी नूं देख के फुरे जो
उंज तां बड़ी जवान ते गंभीर सुन्दरता वाली सी;
पर उस दे सिर दे वाल मुन्ने होए सन । सिंध विच
आम रिवाज़ है कि पती दी मौत 'ते पतनिआं सिर
दे वाल मुन्ना देंदिआं हन ।)

बैठ सुहां दी उच्ची कंधी,
रोशन रहन्दी दुनिआं सन्दी,
ज्युं ज्युं रुमके हवा पुरे दी,
त्युं त्युं आवन पिआरी
यादां तेरिआं ।

तक सुहां दे विंग वलावें,
वेख वेख ढलदे परछावें,
गेड़ समें दे आवन साहवें,
निकल जाण फिर आपे
चीकां मेरिआं ।

तक पाणी दी तेज़ रवानी,
आवे तेरी याद जवानी,
ज्युं ज्युं पैंदी घुंमन वाणी
त्युं त्युं आवन चेते
वंगां तेरिआं ।

वेख वेख सूरज दा घेरा,
चेते आवे खेहनूं तेरा,
ज्युं ज्युं पैंदा जाए हनेरा,
त्युं त्युं न्हेर मचावण
ज़ुलफ़ां तेरिआं ।

दुख ते दरद वंडाउना तेरा,
मेरे ऐब छुपाउना तेरा
खा के झिड़क मनाउना तेरा
कर कर चेते जिन्दड़ी
खावे घेरिआं ।

जे मैं होया ठंडा कोसा,
तूं नहीं कीता उक्का रोसा,
मन्न्आं मैनूं सगों बेदोसा,
किद्दां भुल्लन पिआरी
छोटां तेरिआं ।

डुब्बा सूरज पिआ हनेरा,
कल्ल्ह इसने मुड़ पाउना फेरा,
ऐसा डुब्ब्या सूरज मेरा,
फेर न जिस ने पाईआं,
मुड़ के फेरिआं ।

चले घरां नूं पंछी सारे,
दिल दा पंछी पिआ पुकारे,
थां थां भटके, टक्करां मारे,
हाए ! कित्थे कटसी
रातां न्हेरिआं ।

आन टटहने जोत जगाई,
क्युं चमकें तूं ऐवें भाई ?
मोहन ऐसी चीज़ गंवाई,
लभ्भ ना सक्कन जिस नूं
चमकां तेरिआं ।

(सुहां इक दरिआ है जिस दे कंढे कवी दी
सवरगवासी पतनी 'बसंत' दे पेके सन ।)

बे ख़बरा बे होशा फुल्ला,
हस्स ना चाईं चाईं ।
इस हासे विच मौत गलेफी,
खबर ना तेरे ताईं ।
पै जा अपने राहे राहिया
ना कर पैंडा खोटा,
दो घड़िआं असीं जीउणा, सानूं
हसनो ना अटकाईं ।

चन्न पुन्न्आं तक हस हस वधे,
फेर घटे ते रोवे ।
अध खिड़्या फुल कोई ना छेड़े,
खिड़े तां हर कोई खोहवे ।
पूरी शै नूं डर घाटे दा,
डर ना अद्धी ताईं,
रब्बा ! पिआर मेरे दी मंज़ल
पूरी कदी ना होवे ।

इक दिन मैं फुलवाड़ी विचों
लंघ रेहा सां कल्ला,
कंडे इक गुलाबी फुल दे
बह गए फड़ के पल्ला ।
ना कर ऐडी काहली राहिया,
पल दा पल खलोवीं,
खुशबूआं दे ढोए बाझों,
असां जाण नहीं देना मल्ला ।

लक्कड़ी टुट्ट्आं किड़ किड़ होवे
शीशा टुट्ट्आं तड़ तड़,
लोहा टुट्ट्आं कड़ कड़ होवे,
पत्थर टुट्ट्आं खड़ खड़ ।
लक्ख शाबा आशक दे दिल नूं,
शाला रहे सलामत ।
जिस दे टुट्ट्आं 'वाज़ ना निकले,
ना किड़ किड़, ना कड़ कड़ ।

रुक्खे परबत ख़ैबरी, दिस्से ना तीला,
खड्डां वाछां अड्डिआं सज्जे ते खब्बे ।
सिर-तलवाईआं घाटिआं ना चले हीला,
किल्ली ख़ान ज़मान दी चोटी ते फ़ब्बे ।

पैरां विच पहाड़ दे चारे ही पासे,
हरी सिंघ सरदार ने सन डेरे लाए ।
घेरा चिट्टे तम्बूआं दा एदां भासे,
ज्युं जट्टी दे पैर विच पंजेब सुहाए ।

राह किल्ली दा लुकवां सी ऐसा कोई,
भेती बाझों कठन सी उस ताईं पाना ।
चप्पा चप्पा खोजिआं ने धरती टोही,
लभ्भा ना पर उस दा कोई राह टिकाना ।

इक्क दिहाड़े खोजिआं डिट्ठे सभ्यारे,
नाल पहाड़ी छहट के दो बन्दे लग्गे ।
इक अलूआं छोकरा, इक बुढ्ढे वारे,
पकड़ लिआए दोहां नूं नलूए दे अग्गे ।

कर के मुच्छां कुंढिआं ते चेहरा सूहा,
वल्ल उन्हां दे कदम दो नलूए ने पुट्टे ।
"छेती छेती दस्स द्यो किल्ली दा बूहा,
नहीं तां अन्दर खड्ड दे जाओगे सुट्टे ।"

बिट बिट बुढ्ढे वेख्या सज्जे ते खब्बे,
इक दर खड्डां डूंघिआं, इक दर तलवारां ।
मार खंघूरा बोलिआ, "जे हट्टन सभ्भे,
कल्ला अग्गे शेर दे मैं अरज़ गुज़ारां ।"

कर के अक्खां निक्कीआं ते वाज छुटेरी,
हौली हौली आख्या फिर बुढ्ढे बावे ।
"राह किल्ली दा दस्सनां मैं लक्खां वेरी,
खौफ़ आपने पुत्तर दा पर मैनूं खावे ।

बीबी दाहड़ी रक्ख के मैं किद्दां वेचां,
पुत्तर साहवें इज़्ज़तां सिंघा सरदारा ।
सुट्ट द्यो जे ओस नूं दन्दी तों हेठां,
राह किल्ली दा खोल्ह के मैं दस्सां सारा ।"

चाइआ इक जवान ने मुंडे नूं सुक्का,
विच पताली खड्ड दे सिर परने वाहआ ।
होया नढ्ढा ढहन्द्आं ही तुक्का तुक्का,
वट्ट के मुच्छां बुढ्ढड़े ललकारा लाइआ ।

"नहीं सी तैनूं दस्स्या पहलां सरदारा,
आपने निक्के पुत्त दा डर मैनूं खावे ?
मतां अलूआं छोकरा तक्क लशकर भारा,
आपनी अणखी कौम नूं ना वट्टा लावे ।

ना हुन खड्डां पोंहदिआं ना धमकी काई,
ना तलवारां नंगिआं, ना चेहरा सूहा ।
हक्क बुढ्ढे दी चीर के तेरी सरवाही,
लभ्भेगी हुन सोहण्आं किल्ली दा बूहा ।"

आए नैणां दे वणजारे,
इक्क हत्थ लैंदे, इक्क हत्थ देंदे,
डाढे बे-इतबारे ।

जे तूं नैण नशीले लैणे,
दिल या मज़हब धर जा गहणे,
ला ना ऐवें लारे लप्पे,
नैण ना मिलन हुधारे ।

नैणां वाल्आं दित्ता होका,
जेहड़ा तारे मुल्ल इन्हां दा,
झूंगे दे विच उस नूं दईए,
नाले आलम सारे ।

दस्सी मैनूं मुरशद जाणी,
खरे नैणां दी इक निशानी,
जितने भोले उतने सोहणे,
जितने नीवें उतने पिआरे ।

लैने नी तां बीबा लै लै,
अज्जो लै लै, हुने ही लै लै,
नैण तां मिलदे पहले हल्ले,
सोचीं पए तां हारे ।

चुक्क नैणां दी हट्टीयों डेरा,
मोहन, भा नहीं बणदा तेरा,
दिल तेरा अजे हौले मुल्ल दा,
इह भा करेंदे नी भारे ।

तीरथ तीरथ ख़ैर मंगावे,
गुग्गे ते मढ़िआं पुजवावे,
सिव्आं उत्ते मास रिन्हावे,
अण-होईआं गल्लां करवावे ।
बच्चे जही ना वसत पिआरी,
जिस दी भुक्खी दुनिआं सारी ।1।

होवन भावें मावां परिआं,
नाल हुसन दे डक डक भरिआं,
शाहां घरीं व्याहिआं वरिआं,
पहनन पट्ट हंढावन ज़रिआं,
पूरा कदी शिंगार ना होवे,
जे लालां दा हार ना होवे ।2।

मिआं बीवी पए रुसेवां,
इह विच पै के करे मनेवां,
झम सुट्टे जद कंम वलेवां,
मिट्ठी इस दी लाहे थकेवां,
बच्चे जेहा ना मेवा डिट्ठा,
जितना कच्चा उतना मिट्ठा ।3।

मसकीनां तों शाहां तोड़ी,
गल्ल एस दी किसे ना मोड़ी ।
ख़ातर हसनैणां दी जोड़ी,
बने रसूले अरबी घोड़ी ।
शाहां तीक मनावे इस दे,
वलिआं तीक खिडावे इसदे ।4।

नैण बच्चे दे पिआरे पिआरे,
जीवन-पंध दे नूर-मुनारे ।
कोमल कोमल सूहिआं बुल्हिआं,
इह ने पाक किताबां खुल्ल्हिआं ।
जो नहीं पाठ इन्हां दा करदा,
उह कदी नहीं शायर बणदा ।5।

वेखन विच्च मुलायम
पिंडा नार दा ।
जीकन होवे कूला
फुल्ल अनार दा ।
ला बहन्दी जिस वेले
किधरे अक्खिआं,
पत्थर वांगूं मोड़े,
मूंह तलवार दा ।

नी तूं पाक अनार दी कली है सैं,
तेरे पिआर दा हक्क सी भौरिआं नूं ।
ऐवें मार के हक्क बेदोश्आं दा
दे दित्ता ई बन्द्आं कोरिआं नूं ।
तेरा कंम सी खिड़ना ते महक देणी,
अते डोबना डोबां ते झोरिआं नूं ।
ऐवें बन्दे बे-कदरे दे नाल ला के,
नी तूं लिआ सहेड़ हटकोरिआं नूं ।
मोह खट्टे सलीम दे नाल पा के
कांजी घोली तूं काहनूं परीत अन्दर ?
एस मरद शैतान दा कंम की सी
तेरे दिल दी पाक मसीत अन्दर ?

तेरा कंम सी बनां दे विच वसणा,
काहनूं शाही महल्ल ते भुलीएं नी ?
कंम कली दा हुन्दा ए बन्द रहणा,
क्युं तूं नाल बेगाने दे खुल्ल्हीएं नी ?
तेरा थां सी अरश दे किंगरे 'ते,
ऐवें बन्दे दे पैर विच रुलीएं नी ।
- एस मरद विच पासकू सदा हुन्दा,
इहदे नाल क्युं कंडे ते तुलीएं नी ।
इक्क मरद, दूजा बादशाह हैसी,
तीजा सी उह अकबर दा पुत्त मोईए ।
ऐसे फिट्टे होए भारे हैंकड़ी नूं,
किदां जकड़ सकदी तेरी गुत्त मोईए ?

देंदे आए चिरोकने मरद धोखा,
मकर इन्हां दे कोई ना अज्ज दे नी ।
कंम इन्हां दा भौरां दे वांग फिरना,
इक फुल्ल दे नाल ना बझ्झदे नी ।
दीवा हुसन दा जदों तक रहे बलदा,
झुक्क झुक्क करदे इह वी सजदे नी ।
बुझ जाए, तां वांग परवान्आं दे
वल दूसरे दीवे दे भज्जदे नी ।
लक्ख इन्हां पिच्छे कोई बने तीला,
ऐपर इन्हां नूं फ़िकर ना कक्ख होवे ।
हजर नाल तीवीं भावें बने सुरमा,
तां वी साफ़ ना मरद दी अक्ख होवे ।

असां डुब्बदे बड़े तैराक तक्के,
छलां पैंदिआं जदों दरिआ अन्दर ।
किवें दिल सलीम दा भिज्ज्या ना
तेरे इशक दी डूंघी झना अन्दर ।
किथों सी छलेडा उह बहन वाला,
तेरिआं भोलिआं भालिआं बांहां अन्दर ।
हाए ! पलक तां भैड़े दी अक्ख लगदी
तेरे सरू दी संघनी छां अन्दर ।
किद्दां उहनूं 'जहान' दा मूंह दिस्स्या
तेरी ज़ुलफ़ां दी कज्जली रात दे विच ?
तेरे नैणां दे बाज़ जे ऊंघदे ना,
बहन्दी काहनूं कबूतरी घात दे विच ?

तूं वी 'मेहरां' दे वांग जे हत्थ करदी,
अज्ज कास नूं रगड़दी अड्डिआं नी ?
फफ्फे कुट्टणां कालिआं लिटां दिआं
क्युं ना ओस दे पिच्छे तूं छड्डिआं नी ?
मोती हंझूआं दे तेरे कोल हैसन,
जे कर तार देंदी तूं वी वढ्ढिआं नी ।
फेर हसरतां तेरिआं जांदिआं क्युं
एदां विच दीवार दे गड्डिआं नी ?
ऐसा ठोक के चिण्आं जे पत्थरां नूं,
ऐसा बीड़ के जड़्या ने वट्ट्आं नूं ।
तड़फन लई वी खुल्ल्ही ना थां दित्ती,
एस जग्ग ने इशक दे फट्ट्आं नूं ।

जे तूं गल विच फुल्लां दा हार पाइआ,
तेरे लक्क नूं पए कड़वल्ल, मोईए ।
जे तूं हत्थां ते पैरां नूं लाई महन्दी,
भार नाल तूं सकी ना हल्ल, मोईए ।
हार, गानिआं रह गईआं इक पासे,
भारी लग्गदी सी तैनूं गल्ल, मोईए ।
किद्दां पत्थरां अते उदरेव्आं दे
दूहरे भार अज्ज लए नी झल्ल, मोईए ।
दाबू भारिआं सिलां दा रक्ख्या ने
ख़बरे एस ख़ातर तेरी लाश उत्ते,
मतां हुसन ते इशक दे खंभ ला के
नी तूं उड ना जावें आकाश उत्ते ।

खिड़ी रहे अनार दी कली तेरी,
अते चलदा रहे बाज़ार तेरा !
जम जम मक्के मदीने नूं जाण हाजी,
होवे 'मोहन' दा मक्का मज़ार तेरा !
तेरे दिल नूं वली ना परख सके,
मुल्ल पा ना सके अवतार तेरा !
जहांगीर विचारे दा दोश की ए,
जे उह समझ ना सकिआ पिआर तेरा !
विचों कबर दे मैनूं आवाज़ आई :
मन्न शायरा ! रब्बे-रहीम ताईं ।
मेरिआं अक्खिआं साहमने खढ़ा हो के
मन्दा बोल ना मेरे सलीम ताईं ।

उह केहड़ा बूटा ए ?
हर थां जो पलदा ए-
आरे दे दन्द्आं ते,
रम्बी दिआं धारां ते,
खैबर दे दर्रिआं विच,
सरसा दिआं लहरां ते,
सतलुज दे कंढे ते,
लक्खी दे जंगल विच,
रोड़ां विच, रकड़ां विच,
बंजरां विच झक्खड़ां विच,
गड़्आं विच, मीहां विच,
सरहन्द दिआं नीहां विच,
जित्थे वी ला दईए,
ओथे ही पलदा ए,
जितना इह छांग दईए,
उतना इह फलदा ए ।

उह केहड़ा बूटा ए ?
भुक्ख्आं तरेहाइआं नूं,
जो फल खवांदा ए,
थक्क्आं ते टुट्ट्आं नूं,
छां विच सवांदा ए ।
जेहड़ा वी शरन लवे,
उस ताईं बचांदा ए ।
जे झक्खड़ आ जावे,
जे 'न्हेरी आ जावे,
अबदाली आ जावे,
कोई नादर आ जावे,
मासूम गुटारां नूं,
बेदोशिआं चिड़िआं नूं,
बेलोसिआं घुगिआं नूं,
कूंजां दिआं डारां नूं,
इह तुरत छुपा लैंदा,
इह आहलने पा लैंदा
ते राखा बण बहन्दा ।

पैर इस दे धरती 'ते,
पर आप उचेरा ए ।
जेल्हां दिआं कोठड़िआं,
ज़ंजीरां हत्थकड़िआं,
इह रस्से फांसी दे,
ते तड़िआं राज दिआं,
जागीरां दे चकमे,
सरदारी दे तमग़े,
दुनिआं दिआं तंग-दिलिआं,
तेड़ां ते पाड़ां,
गुमराहिआं रंग-रलिआं,
ते कुड़िआं झंग दिआं,
इहदे गोड्यों थल्ले ने,
इहदे गिट्ट्यों थल्ले ने,
इहदे पैरों थल्ले ने,
जिथे दिल इस दा ए,
जिथे सिर इस दा ए,
योह थां उचेरी ए,
उह खुल्ही हवा विच ए,
उह पाक फिज़ा विच ए,
उह खास ख़ुदा विच ए,
जिथे ना वैर कोई ।
जिथे ना ग़ैर कोई ।

की होया जे ?
अज शाखां एस दिआं,
अज लगरां एस दिआं,
आपो विच पाट गईआं,
आपो विच तिड़क गईआं,
कोई पूरब चली गई,
कोई पच्छम चली गई,
कोई पिंडी मल्ल बैठी,
कोई भैनी जा बैठी,
पर मुढ्ढ तां इको ए,
पर खून तां सांझा ए ।

फुल्ल दे कोलों बुलबुल पुच्छे-
"मैनूं समझ ना आई,
तूं किंज बणदा हार गले दा ?
मैं किंज फसां फाही ?"
फुल्ल बोलिआ, "जीभ इकलड़ी,
तैथों रुक्क ना सक्के ।
सौ जीभां दे हुन्द्आं पर मैं,
रखदा भेद छुपाई ।

विच सुखां दे सारी दुनिआं,
नेड़े ढुक ढुक बहन्दी ।
परखे जाण सजन उस वेले,
जद बाज़ी पुट्ठी पैंदी ।
विच थलां दे जिस दम सस्सी
बैठ खुरे ते रोंदी,
नस ग्या कजला रुढ़ पुढ़ जाणा,
हत्थ ना छड्या महन्दी ।

मल्ल बनेरा सबज़ां बैठी,
राह सैदे दा वेखे ।
कन्न घोड़ी दिआं टापां वल्ले,
दिल विच करदी लेखे ।

छम छम करदी बक्की आई,
महन्दी नाल शिंगारी ।
सिर सैदे दे पंज-रंग चीरा,
पैर जुत्ती पुठुहारी ।

बूहे दे विच सबज़ां खल्ली,
पा खद्दर दा चोला ।
पैरां दे विच ठिब्बी जुत्ती,
सिर ते फटा परोला ।

छम छम करदी बक्की आई,
लंघ गई पैलां पांदी ।
तक्क सैदे दिआं बेपरवाहिआं,
सबज़ां पै गई मांदी ।

विच गली दे सबज़ां खल्ली,
भर खब्बल दी झोली ।
छम छम करदी बक्की आई,
खढ़ गई हौली हौली ।

तक सबज़ां दी अहल जवानी,
चन्नण-वन्ना मत्था ।
दिल सैदे दा ग्या मरुंड्या,
झब्ब घोड़ी तों लत्था ।

अग्गे सबज़ां, पिच्छे सैदा,
ढारे दे विच आए ।
छैल सैदे दा उच्चा शमला,
छत्त घरून्दा जाए ।

नुक्कर विच कुझ भांडे आहे,
इक दूजे ते खल्ले ।
इक इक करके सारे भांडे,
सबज़ां लाहे थल्ले ।

थलवें भांडे दे विच उस ने,
सी कोई चीज़ लुकाई ।
डरदी ड्रदी पा झोली विच,
सैदे कोल लिआई ।

कम्बदा कम्बदा हत्थ ओस ने,
झोली वल्ल वधाइआ ।
तक्क अंड्आं दी जोड़ी, सैदे
गल सबज़ां नूं लाइआ ।

कल्ल्ह सन जित्थे मौज बहारां,
लक्खां ख़ुशिआं, सुक्ख हज़ारां,
अज्ज उह हस्सदी वस्सदी नगरी
हो गई खोले खोले ।

किते काढ्आं भौन बणाए,
किधरे बिज्जूआं घुरने पाए,
किधरे गिद्दड़ पिआ हवांके,
किधरे उल्लू बोले ।

किधरे चूहे छालां मारन,
किधरे साहने धौन हुलारन,
किधरे बैठ रुड्ड दे अन्दर
सप्प पिआ विस घोले ।

थां थां रुलन वंगां दे टोटे,
टुट्टिआं टिंडां, बोड़े लोटे,
तिड़के बीड़े, धेले खोटे,
ठिब्ब खड़िब्बे पौले ।

किधरे रुलदे नाअल पुराणे,
किधरे खिलरे घोगे काणे,
किधरे मल्हआं दे विच फसे,
पाटे होए परोले ।

इह सिक्के दा चिब्बा छल्ला,
रुल रेहा जो कल्ल मकल्ला,
दित्ती होसी किसे निशानी,
खढ़ चन्ने दे उहले ।

इस भौरी दिआं निक्कीआं अक्खां,
तक्के होसन त्रिंञन लक्खां,
इस तौड़ी विच चाहड़े होसन,
किसे सवानी जौले ।

कित्थे ने उह महल चुबारे,
कित्थे ने उह छन्नां ढारे,
लांदे सीगे रौणकां जित्थे,
बालक आले भोले ।

कित्थे ने उह मौजी बन्दे,
जेहड़े छड्ड दुनिआं दे धन्दे,
बैठ चन्द दी टिक्की थल्ले,
सन गांवदे ढोले ।

किद्धर लद्द गए उह वेले,
जिस दम कुड़िआं संझ सवेले,
जांवदिआं सन गन्दलां तोड़ण,
पीच पीच के झोले ।

कित्थे ने उह सालू सूहे
कित्थे ने उह थिन्दे बूहे,
शगनां नाल लंघे जित्थों दी
वहुटड़िआं दे डोले ।

पै गए ओस कंध नूं धाड़े,
जिस ते ला के महन्दी लाड़े,
चुक्क अड्डिआं पंजा लाइआ,
कुड़िआं गावें सोहले ।

कित्थे ने उह हद्दां बन्ने,
जिन्हां सिर जट्टां दे भन्ने,
किद्धर ने उह सांझां बखरे,
जिन्हां घग्गर खोल्हे ।

रहे ना कुंडिआं मुच्छां वाले,
रहे ना रानी खां दे साले,
रही ना चौड़ी चकली छाती,
गट्टां वाले डौले ।

रह गई इक उच्ची जही ढेरी,
ना उह तेरी ना उह मेरी,
जिस ते आउंदा जांदा राही,
इक दो हंझू डोल्हे ।

वागां छड्ड दे हंझूआं वालीए नी,
पैर धरन दे मैनूं रकाब उत्ते ।
साडे देश 'ते बनी है भीड़ भारी,
टुट्ट पए ने वैरी पंजाब उत्ते ।
रो रो के पाणी ना फेर ऐवें,
मेरे सोहणे पंजाब दी आब उत्ते ।
सरू वरगी जवानी मैं फूकणी एं,
बह गए भूंड जे आ के गुलाब उत्ते ।
केहड़ी गल्लों तूं हउके ते लएं हउका,
केहड़ी गल्लों तूं अक्खां सुजाईआं ने ?
लांघे पंजां दरिआवां दे सन थोहड़े
जो तूं होर दो नदिआं चढ़ाईआं ने ।

फूही फुही नूं सहकदे वीर मेरे,
की करां मैं दुद्धां छुहारिआं नूं ।
साथी तड़फदे पए ने ख़ाक अन्दर,
पच्छी लावां मैं महलां चुबारिआं नूं ।
फ़ौजी बाज्आं आण घनघोर पाई,
लग्ग रेहा ए डगा नगारिआं नूं ।
मेरे घोड़े वी चुक्क लए कन्न दोवें,
देख इहद्आं खुरां फुंकारिआं नूं ।
डौले फरकदे पए ने अज्ज मेरे,
जोश नाल पई कम्बदी जाण मेरी ।
जीभां कढ्ढदे पए ने तीर गिठ गिठ,
पई आकड़ां भन्नदी कमान मेरी ।

विच रंग दे मसत मलंग हो के,
लाईए तारिआं असीं झना अन्दर ।
विच जंग दे तली 'ते जाण धरके,
लड़ीए असीं तलवारां दी छां अन्दर ।
विच रंग दे छिंजां ते घोल पाईए,
ढोले गावीए हलां दे गाह अन्दर ।
विच जंग दे ख़ून दी ला महन्दी,
पाईए बांह तलवार दी बांह अन्दर ।
असीं पंजां दरिआवां दे शेर दूले,
दोहां देविआं नूं निमशकार साडी ।
विच रंग दे देवी है नार साडी,
विच जंग दे देवी कटार साडी ।

विच जंग दे भावें मैं चल्लिआ हां,
तां वी रखसां तेरा ख़्याल पिआरी ।
बुन्दे समझ के तेरे मैं छर्रिआं नूं,
लासां घुट्ट कलेजे दे नाल पिआरी ।
धूंआं वेख के तोपां 'चों पेच खांदा,
तेरे समझसां घुंगरे वाल पिआरी ।
तेरे पलकां दी याद विच तीर खासां,
हाथी वेख चितारसां चाल पिआरी ।
जे मैं जींदा जागदा परत आया,
'रक्ख साईं दी' मैनूं बुला छड्डीं ।
नहीं तां पुत्त जद मेरा जवान होया,
तेग़ ओस नूं मेरी फड़ा छड्डीं ।

सरघी वेले सुफ़ना डिट्ठा,
मेरे सोहणे आउना अज्ज नी ।
पई चढ़ां मैं मुड़ मुड़ कोठे,
कर कर लक्खां पज्ज नी ।

धड़कूं धड़कूं कोठी करदी,
फड़कूं फड़कूं रग नी !
कदन ढक्कीयों उची होसी,
उह शमले वाली पग्ग नी ।

जूहां, जंगल, बांगर बेले,
कच्छ ना उञे यारा ।

दुनिआं विच सगों तिरखेरा,
लभदा ए उह पिआरा ।

उजड़े दिल, वसदिआं अक्खां,
विच ना जिस नूं दिस्से,
जंगल दे कंड्आं विच उस नूं,
देवे किंज नज़ारा ।

कल्ल्ह सुफने दे विच मैनूं,
दो नज़र फ़रिशते आए ।
इक तख़त फुल्लां दा सोहणा,
उह आपने नाल लिआए ।
उह उतरे हौले हौले,
फिर आ के मेरे कोले,
रक्ख तख़त फुल्लां दा बोले,
उठ तैनूं रब्ब बुलाए ।1।

तेरे लई सुरगां अन्दर,
भौरां ने गुन्दे सेहरे ।
ज़ुलफ़ां दे लच्छे लै के,
हूरां ने बहुकर फेरे ।
पंछी पए मंगल गावण,
फुल्लां दे दिल सधरावण,
कलिआं नूं छिक्कां आवण,
सभ राह तकावन तेरे ।2।

हत्थ बन्न्ह खलोवन उथे,
हूरां परिआं मुट्यारां ।
शहदां दे चशमे वगण,
ते दुद्धां दिआं फ़ुहारां ।
ना उथे हौके हावे,
ना भुक्ख तरेह सतावे,
ना रुत्त खिज़ां दी आवे,
ते हरदम रहन बहारां ।3।

सुरगां दिआं सिफ़तां सुन के,
मैं केहा फ़रिशते ताईं,
ऐसा इक्क-सारा जीवन,
मैं मूल पसन्दां नाहीं !
जित्थे ना मेल जुदाईआं,
जित्थे ना सुलह लड़ाईआं,
ना धीदो ते भरजाईआं,
मैं जाणा नहीं उथाईं ।4।

जित्थे नहीं होत कसाई,
जित्थे नहीं छल-छलावे ।
जित्थे ना कैदों लंङा,
विच टंग आपनी डाहवे,
जित्थे ना आशक लुस्सण,
जित्थे ना रूहां खुस्सण,
जित्थे ना हूरां रुस्सण,
उह सुरग ना मैनूं भावे ।5।

है जीवन अदला बदली ।
ते होणा रंग बरंगा ।
सौ मुरदे भगतां कोलों,
इक ज्यूंदा ज़ालम चंगा ।
मोती तों हंझू महंगे,
लालां तों जुगनूं सोहणे,
सुरगां तों दोज़ख चंगे,
जित्थे है जीवन-दंगा ।6।

मैं शायर रंग-रंगीला,
मैं पल पल रंग वटावां ।
जे वटदा रहां तां जीवां,
जे खल्लां ते मर जावां ।
झीलां तों चंगे नाले,
जो पए रहन नित्त चाले,
तक्क रोकां खान उछाले,
ते वधदे जाण अगाहां ।7।

है जीवन दुक्ख-वंडाणा,
ते अग्ग बगानी सड़ना ।
मरने दी ख़ातर जीना ।
जीने दी ख़ातर मरना ।
जीवन है लड़ना खहणा,
जीवन है ढाना ढहणा
जीवन है तुरदे रहणा,
ते कोई पड़ा ना करना ।8।

डिट्ठी मैं असमान 'ते, अज्ज सवेरे सार ।
भूरी किसे फ़कीर दी, पाटी तारो तार ।
वांग पहाड़ी बाज़ दे, खुल्हे खंभ खिलार ।
लांदी फिरे उडारिआं, अम्बर दे विचकार ।

थां थां लग्गिआं टाकिआं, रंग बरंगे चीर ।
खुत्थी फित्थी हंढवीं छज्ज छज्ज लमके लीर ।

लाह के आपने जुस्स्यों सुट्टी किसे फ़कीर ।
सिर 'ते चुक्क लई रब्ब ने मिट्ठी कर के लीर ।

ना कुझ उस दी जड़त सी ना कुझ उस दी छब्ब ।
ख़बरे केहड़ी चीज़ 'ते भुल्लिआ भुक्खा रब्ब !

बोल बोल कावणी,
ढोल वस्से छावणी,
हत्थीं मेरे चूड़िआं, मत्थे मेरे दावणी,
बीत गई हाढ़ी सारी,
लंघ गई सावनी ।
ठिप ठिप ठिप ठिप,
मैं ते खिद्दो इक्क मिक्क !

ज्युं ज्युं खिद्दो मच्चदा,
कलेजा मेरा नच्चदा ।
पल्ला मेरा तिल्हकदा,
परांदा मेरा ढिलकदा,
चूड़ा मेरा छणकदा,
हमेल मेरी डोलदी,
इक तां हिलावे खिद्दो
इक्क तांघ ढोल दी ।
ठिप ठिप ठिप ठिप,
मैं ते खिद्दो इक्क मिक्क !

इह की खिद्दो छोहलिआ ?
इह की खिद्दो गोलिआ ?
हक्क वल्ल आवें,
मेरे बुल्ल्हां वल्ल जावें,
मेरी गल्ल्हां वल्ल धावें,
हक्क ढोल दी अमान,
बुल्ल्ह ढोल दी अमान,
वे तूं हो ग्या शतान,
वे तूं डाढा बईमान,
दस्स इह की ए मख़ौल वे ?
मार मार धफ्फे तैनूं,
कर द्आंगी गोल वे ।
ठिप ठिप ठिप ठिप,
मैं ते खिद्दो इक्क मिक्क !

इक बूटा अम्बी दा,
घर साडे लग्गा नी ।
जिस थल्ले बहना नी,
सुरगां विच रहना नी,
की उसदा कहना नी,
वेहड़े दा गहना नी,
पर माही बाझों नी,
परदेसी बाझों नी,
इह मैनूं वढ्ढदा ए,
ते खट्टा लग्गदा ए ।

इस बूटे थल्ले जे,
मैं चरखी डाहनी आं,
ते जी परचावन नूं,
दो तन्दां पाणी आं,
कोइल दिआं कूकां नी,
मारन बन्दूकां नी,
पीहड़े नूं भन्नां मैं,
चरख़ी नूं फुकां नी ।

फिर ड्रदी भाबो तों,
लै बहां कसीदा जे-
यादां विच डुब्बी दा,
दिल किधरे जुड़ जावे,
ते सूई कसीदे दी,
पोटे विच पुड़ जावे ।
फिर उठ के पीहड़े तों
मैं भुंजे बह जावां,
चीची धर ठोडी 'ते
वहणां विच वह जावां-
सुक्खां दिआं गल्लां नी,
मेलां दिआं घड़िआं नी,
खीरां ते पूड़े नी,
सावन दिआं झड़िआं नी,
सुहने दे तरले नी,
ते मेरिआं अड़िआं नी,
जां चेते आ जावण,
लोहड़ा ही पा जावन ।

उह केहा दिहाड़ा सी ?
उह भागां वाला सी,
उह करमां वाला सी,
जिस शुभ्भ दिहाड़े नी,
घर मेरा लाड़ा सी ।

मैं ना्हती धोती नी,
मैं वाल वधाए नी,
मैं कजला पाइआ नी,
मैं गहने लाए नी,
मल मल के खोड़ी मैं,
हीरे लिशकाए नी,
ला ला के बिन्दिआं मैं,
कई फंध बणाए नी ।
जां हार शिंगारां तों,
मैं वेहली होई नी,
आ अम्बी थल्ले मैं,
फिर धूनी छोही नी ।

उह चन्द पिआरा वी,
आ बैठा साहवें नी,
अम्बी दी छावें नी ।
उह मेरिआं प्रीतां दा,
सुहना वणजारा नी ।
किस्से परदेसां दे,
लामां दिआं गल्लां नी,
घुमकार जहाज़ां दी,
सागर दिआं छल्लां नी,
वैरी दे हल्ले नी,
सोहणे दिआं ठल्ल्हां नी,
उह दस्सी जावे ते,
मैं भरां हुंगारा नी ।

उस गल्लां करदे नूं-
पत्त्आं दी खड़ खड़ ने,
बदलां दी शूकर ने,
वंगां दी छण छण ने,
चरख़ी दी घूकर ने,
टप्प्आं दी लोरी ने,
कोइल दी कूकर ने,
मंजे 'ते पा दित्ता,
ते घूक सुला दित्ता ।

तक्क सुत्ता माही नी,
चरख़ी दी चरमख तों,
मैं कालख़ लाही नी,
जा सुत्ते सुहने दे,
मत्थे 'ते लाई नी ।
मैं खुल्ल्ह के हस्सी नी,
मैं ताड़ी लाई नी ।
मैं दूहरी हो गई नी,
मैं चौहरी हो गई नी,
उह उठ खलोअा नी,
घबराइआ होया नी ।
उह बिट बिट तक्के नी,
मैं खिड़ खिड़ हस्सां नी,
उह मुड़ मुड़ पुच्छे नी,
मैं गल्ल ना दस्सां नी ।

तक्क शीशा चरख़ी दा,
उस घूरी पाई नी,
मैं चुंगी लाई नी,
उह पिच्छे भज्जा नी,
मैं द्आं ना डाही नी,
उस मान जवानी दा,
मैं हट्ठ ज़नानी दा,
मैं अग्गे अग्गे नी,
उह पिच्छे पिच्छे नी,
मंजी दे गिरदे नी,
नस्सदे वी जाईए नी,
अम्बी दे गिरदे नी,
हस्सदे वी जाईए नी,
उहदी चादर खड़के नी,
मेरी कोठी धड़के नी,
उहदी जुत्ती चीके नी,
मेरी झांजर छणके नी,
उहदी पगड़ी ढह पई नी,
मेरी चुन्नी लह गई नी,
जां हफ के रह गए नी,
मंजी ते बह गए नी ।

उह केहा दिहाड़ा सी ?
उह भागां वाला सी,
उह करमां वाला सी,
जिस शुभ्भ दिहाड़े नी,
घर मेरा लाड़ा सी ।

अज्ज खान हवावां नी,
अज्ज साड़न छावां नी,
तरख़ान सदावां नी,
अम्बी कटवावां नी,
तोबा मैं भुल्ली नी,
हाड़ा मैं भुल्ली नी ।
जे अम्बी कट्टांगी
चढ़ किस दे उत्ते,
राह ढोले दा तक्कांगी ?

रब्बा तैनूं तरस ना आया,
इह की ए तूं न्हेर मचाइआ ?
रच के ऐसा सुहना मन्दर,
इक दीवा वी नहीं जगाइआ ?

वाह तूं बाग़ हुसन दा लाइआ,
चम्बा अते गुलाब खिड़ाइआ ।
शब्बू ते लाला सहराई,
केहड़ी शै जो तूं नहीं लाई ।
पर उह बाग़ ना उक्का सोहे,
जिस दे विच ना नरगस होए ।

तेरे जेहा ना करड़ा माली,
नहीं चंगी ऐेडी रखवाली ।
खोल्ह दोवें हरनोटे छेती,
नहीं उजड़दी तेरी खेती ।
नैं इशक दी ठाठां मारे,
नज़रां-लहरां लैन हुलारे,
हरसां बदिआं न्हेरा पाइआ,
मच्छां, कच्छां घेरा पाइआ,
कर के रौशन नूर-मुनारे,
ला सोहणी नूं किसे किनारे ।

अन्न्ही कुड़ी ते 'मोहन' दोवें,
इह तसवीरां सोहण दोवें ।
इक्क तसवीर हुसन दी राणी,
दूजी मूरत कविता जाणी ।
चिर होया तूं दोवें छोहिआं,
ऐपर अजे ना पूरन होईआं ।
छेती कढ्ढ के मेरे आने,
कर आबाद इहदे अखवाने ।
बेशक मेरी रहे अधूरी,
इक तसवीर तां होवे पूरी ।

पिआरे पिआरे,
नन्न्हे तारे,
सूरज दे पिघले सोने विच,
ख़बर नहीं क्युं ढलदे,
आपा छलदे ।

मोतिआं वरगी,
त्रेल सवरगी,
वायू दी निघ्घी बुक्कल विच
ख़बर नहीं क्युं लुकदी
ऐवें मुकदी ।

लहरां वाली
नदी सुचाली
ख़बर नहीं खारे सागर विच
ग़रक क्युं हो जांदी,
आप गवांदी ।

मैनूं ते जे,
रब वी आखे आ मेरे चौड़े पन दे विच रल जा'
कदी ना रल्लां,
वख ही खल्लां ।

रब विच रल के,
आपा छल के,
हाए ! सकांगा मान किवें मैं
दुनिआं दे नज़्ज़ारे,
रस रंग सारे ।

उह की बन्दा ?
चंगा या मन्दा,
रक्ख ना सके जो सभ दुनिआं तों
वखरा अपना आपा,
कल्ल कलापा ।

देह हवा दा जीवन सानूं,
सदा खोज विच रहीए ।
हर दम तलब सजन दी करीए,
ठंढे कदी ना पईए ।
जंगल गाहीए, रेतड़ वाहीए,
नाल पहाड़ां खहीए ।
इको साहे भजदे जाईए,
किसे पड़ा ना लहीए ।
वेख मुलायम सेज फुलां दी
धरना मार ना बहीए ।
सौ रंगां दे विचों लंघ के,
फिर वी बेरंग रहीए ।
जे कोई बुलबुल हाकां मारे,
कन्न विच उंगलां दईए ।
जे कोई कंडा पल्ला पकड़े,
छंडीए ते नस्स पईए ।
देह हवा दा जीवन सानूं,
सदा खोज विच रहीए ।

बल्ले बल्ले बग्ग्या शेरा,
अशके अशके वगना तेरा ।
तूं चलदा ते दुनिआं चलदी,
तूं खल्ल्हदा ते दुनिआं खल्ल्हदी, ।
तेरे वरगा केहड़ा बली,
जिस दे सिंङ 'ते दुनिआं खली ।
तता तता तता तता…

झुल्ल तेरी नूं लग्गे छब्बे,
गल तेरे विच गानी फब्बे,
तेरे संग हमेलां, टल्लिआं,
मैं गावां इह मारन तलिआं ।
तता तता तता तता…

वहुटी मेरी सज्ज-व्याही,
किन्ना सारा दाज लिआई ।
विच लिआई चीरा मेरा,
नाले इक मखेरना तेरा ।
तता तता तता तता…

इह मखेरना भागां भरिआ,
मेरी सज्ज-व्याही जड़्या ।
फुंमणां अते ज़ंजीरां नाल,
घोग्आं ते तसवीरां नाल ।
तता तता तता तता…

मत्थे तेरे मखेरना पा के,
नाल झांजरां पैर सजा के,
लक्क आपने चादर खड़का के,
डब्बां विच रुपईए पा के,
बन जावांगे दोवें छैले,
फेर चलांगे आपां मेले ।
तता तता तता तता…

डिट्ठी मैं जवानी, इक जट्टी मुट्यार ते,
विछी होई इक सूबेदार दे पिआर ते ।

मत्था उहदा डल्हकदा ते नैणां विच नूर सी,
रूप दा गुमान ते जवानी दा ग़रूर सी ।

आकड़ी नरोई, फ़ुल्ल वांग खिड़ खिड़ हस्सदी,
साबन दी चाकी वांग तिलक तिलक नस्सदी ।

सेम वांग सिंमदा सुहाग दा संधूर सी,
बोतल दा नशा उहदे नैणां च सरूर सी ।

कस्से होए पिंडे उत्तों मक्खी तिलक जांदी सी,
हुसन दे हुलारे शमशाद वांग खांदी सी ।

चीकू वांग मिट्ठी ते खरोट वांग पक्की सी,
पिया दा पिआर न संभाल हाल सक्की सी ।

जोबन मञैलणां दा झलकदा गुलाब ते,
शाला एहो रंग चढ़े सारे ही पंजाब ते ।

जिस ने हत्थां मेरिआं 'ते रंग जमाणा,
उह महन्दी दा बूटड़ा है अजे अंञाणा,
जिस दे चिट्टे दन्द दा मैं चूड़ा पाणा,
उह हथनी विच बेल्आं वत्ते अलबेली,
साह लै मौते काहलीए मैं अजे ना वेहली ।

अजे ना आपने वीर दी मैं घोड़ी गाई,
जौं-चरवाई लई ना, ना वाग फड़ाई,
अजे ना भाबी आपनी नूं झात बुलाई,
ना मैं पींघां झूटिआं ना सावें खेल्ही,
साह लै मौते काहलीए मैं अजे ना वेहली ।

हंझू मेरे राखवें, अण-वंडिआं आहीं,
सहकन मेरे दीव्आं ताईं ख़नगाहीं,
अक्खां अजे ना मेरिआं लग्गिआं ने राहीं,
ना मैं आपने हान दा कोई चुणिआ बेली,
साह लै मौते काहलीए मैं अजे ना वेहली ।

ना वंञ ढोला चन्नना !
नित्त नित्त असां ना हाड़े कढ्ढणे,
नित्त नित्त तूं नहीं मन्नना ।

जे जीवें तेरा रहना कूड़ा,
लाह वंञ हत्थी मेरा चूड़ा,
खोल्ह जा नाले कंङना ।

पता हुन्दा जे होणा धोखा,
चुक्क सुट्टदी मैं घुंड चिरोका,
भट्ठ विच पांदी संङना ।

ख़बर हुन्दी जे पऊ विछोड़ा,
मोहन चाय करदी मैं थोहड़ा,
पिआर ना पांदी संघना ।

रोज़ा तेरा, सोहणीए !
लोकां लई मसान ।
पर शायर दी नज़र विच,
इह इक पाक कुरान ।
तेड़ां इहदिआं आइतां,
जे पढ़ीए नाल ध्यान,
ख़ुदी तकब्बर छड्ड के,
बन जाईए इनसान ।

1
फुटी पहु मूंह-झाखरा आण होया,
तांघ-नैणिआं अक्खिआं मल्लिआं ने ।
त्रेल-मोतिआं दी मूंह-विखाई लै के,
चाए घुंड शरमाकलां कल्लिआं ने ।
बाहर कढ्ढ्या गुज्जरां चौण्आं नूं;
दुद्धां विच मधाणिआं हल्लिआं ने ।
सक्क मलदिआं, रावी दे पत्तणां नूं
अग्ग लान लाहौरना चल्लिआं ने ।

एहो जेहे दिल-खिच्चवें समें अन्दर,
आपने आप नूं शहर 'चों खिच्च लिआ मैं ।
हवा फक्कदा रावी दे कंढ्आं दी,
शाही रोज़्आं उत्ते जा निकलिआ मैं ।

2
की हां विंहदा ! बबोहआं ते किरल्आं दी
लत्थी होई ए हर थां बरात अन्दर ।
चप्पे चप्पे 'ते मकड़िआं जाल तणके,
दड़िआं होईआं ने मक्खी दी घात अन्दर ।
छत्तां नाल चमगादड़ां लमकिआं ने;
छाई होई ए मस्स्या दी रात अन्दर ।
या फिर अजे वी बेग़म दे हुसन कोलों,
डरदा सूरज ना पांवदा झात अन्दर ।

वेख मोतिआं वाली दे मकबरे नूं,
केहड़ी अक्ख बह के छम छम रोंवदी नहीं ।
कसम रब्ब दी एकना नाल तां फिर,
किसे जोगन दी झुग्गी वी होंवदी नहीं ।

3
डाटां खक्खड़ी वांगरां पाटिआं ने,
थां थां पईआं तरेड़ां दीवार अन्दर ।
धूंएं नाल धवांखे ने छत्त लोकां,
बाल बाल के अग्गां पसार अन्दर ।
शम्हादान काफ़ूर दे जग्गदे सन,
कल्ल्ह जिस दे शाही दरबार अन्दर ।
अज्ज मिट्टी दा दीवा वी बालदा नहीं,
कोई ओस दे उजड़े मज़ार अन्दर ।

इहो जेही सोहणी शकलवन्द सूरत,
रब्बा मेरिआ या ते बणाइआ ना कर ।
जे तूं बिनां बणाए नहीं रह सकदा,
विच ख़ाक दे एदां मिलाइआ ना कर ।

4
जिस दे डल्हकने हुसन दी सोट वेले,
सूरज चन्द वरगे नूर झुठदे सन ।
जिस दे पिअरिआं नैणां दे ठग्ग दोवें,
दिल जांद्आं राहिआं दे मुट्ठदे सन ।
सूहे फुल्लां दी अग्ग नूं हत्थ लाइआं,
जिसदे पोट्आं 'ते छाले उठदे सन ।
जिस दे मांदरी-हुसन दा दीद करके,
मुरदे उठदे ते जींदे कुट्ठदे सन ।

रब्बा ! उस दी जाण वी लैन लग्आं,
अज़राईल तेरा ज़रा कम्ब्या नहीं ?
जिवें लेटी सी ओवें ही दिसदी ए,
हाए ! शोहदी दा पासा वी अम्ब्या नहीं ?

5
जिस दी राजसी चालां दी धांक सुन के,
चंगे चंग्आं दे छक्के छुट्टदे सन ;
जिस दी शायरी दे रोअब दाब अग्गे,
'बूकलीम' वरगे धोणां सुट्टदे सन ;
जिस दे मत्थे दी घूर दे वट्ट जा के,
शाही काग़ज़ां दे गले घुट्टदे सन ;
जिस दी उडनी अकल दे तीर खा के,
नीले अम्बरां 'चों तारे टुट्टदे सन ;

योस अकल दी पुतली दे मकबरे 'ते,
अज्ज हसरतां दी झड़ी वस्सदी ए ;
ना ही कोई भम्बट आ के रोंवदा ए ;
ना ही कोई बुलबुल बैठी हस्सदी ए ।

6
आयो बुलबुलो ! बेग़म दे मकबरे 'ते,
ज़रा रल मिल के चह चहा लईए ।
आयो भम्बटो ! हुसन दी शम्हां उतों,
रल मिल के जाणां घुमा लईए ।
आयो बद्दलो ! मलका दी याद अन्दर,
बिद्द बिद्द के हंझू वसा लईए ।
आयो भौर्यो ! भूं भूं दा शोर पा के,
सुत्ती हूर नूं मुड़ के जगा लईए ।

उसदी बातनी ख़ूबी नूं कोई रोवे,
अते कोई रोवे उसदी ज़ाहरी नूं ।
मैनूं किसे वी गल्ल दा नहीं मन्दा,
मैं ते रोवना वां उहदी शायरी नूं ।

7
उहदी शायरी दी जदों याद आई,
ढेरी हौसले मेरे दी ढहन लग्गी ।
डौर-भौर हो के पिछांह जा पिआ मैं,
नदी हंझूआं दी अक्खों वहन लग्गी ।
रोंदे रोंद्आं लग्ग गई अक्ख मेरी,
नींद मिट्ठड़ी-मिट्ठड़ी पैन लग्गी ।
सुत्ता देख मैनूं, नूर जहां बेग़म
विच ख़ाब दे आ के कहन लग्गी :

"मेरी शायरी दी जिवें कदर करके,
मेरी कबर 'ते केरे नी चार हंझू ।
इवें मोहना तैनूं वी याद करके,
लोकीं केरसनगे बे-शुमार हंझू ।"

मेरे फुल्ल झना विच पाने ।

मैं शायर मेरे फुल्ल सुहावे,
कदर इहनां दी कोई आशक पावे,
गंगा बाहमनी की जाणे,
मेरे फुल्ल झना विच पाने ।

रूहां हीर ते सोहणी दिआं,
फिरन झना दे अन्दर पईआं,
पैर दोहां दे वाहणे,
मेरे फुल्ल झना विच पाने ।